Pas vendimit të PZAP-it që ka hedhur poshtë vendimin e kundërligjshëm të KQZ-së që lejonte votimin jashtë përfaqësive diplomatike – përfshirë në restorante, kryetari i LDK-së, Lumir Abdixhiku, ka reaguar ashpër duke e quajtur këtë përpjekje një tentativë për manipulim të organizuar të votave nga Vetëvendosja.
Ai tha se “që nga caktimi i datës së zgjedhjeve, e deri më sot, po provohet nga Vetëvendosja në çdo mënyrë të ndërtohet një sistem i manipulimit të votave”, duke kujtuar edhe tentimin e mëhershëm për rikthimin e votimit me email, të cilin e quajti praktikë të abuzimit masiv me fletëvotime.
Abdixhiku theksoi se mërgata sot ka mënyrën më të lehtë të votimit, qoftë në ambasada e konsullata, qoftë përmes postës, dhe se vetëm proceset e garantuara nga shteti mund të sigurojnë integritetin e zgjedhjeve. “Sektit të Vetëvendosjes nuk i intereson vota e mërgatës; ata duan t’i printojnë vet fletëvotimet, t’i mbushin vet, t’i manipulojnë vet”, theksoi ai, duke shtuar se “Kosova po zgjohet, mërgata po rikthehet, e paniku i tyre është shenja e parë e humbjes që i pret.”
Reagimi i plotë:
Paskan reaguar i madh e i vogël në sektin e Vetëvendosjes. Natyrisht me mashtrim, pa fakte, me propagandë – siç dijnë vet ata. Mashtrimi u është bërë mendësi sot.
E vërteta është se që nga caktimi i datës së zgjedhjeve, e deri më sot, po provohet nga Vetëvendosja në çdo mënyrë të ndërtohet një sistem i manipulimit të votave. I vjedhjes së tyre për ta thënë thejshtë.
Një herë, provuan ta kthejnë sistemin e vjetër të votimit me email. Atë ku një militant, para televizorit, mbushte qindra e qindra fletvotime vet. Merreni me mend: në Kosovë kalojmë në dhjetëra hapa sigurie para se një fletëvotim të pranohet e të numërohet; këta, të pakënaqur nga rezultati i fundit lokal, donin t’i kthenin kohët e vjetra të votimeve e manipulimeve masive. Rastet e tilla jane ende të deponuara në hetuesi e prokurori. KQZ natyrisht nuk e lejoj. Drejtësia dhe ligji qëndruan.
Pastaj provuan të votojnë në depo mallrash, salla dasmash e restorante; pra jashtë ambasadave e konsullatave siç e thotë ligji. Votime në vende ku nuk ka shtet, nuk ka kontroll, nuk ka monitorim. PZAP, natyrisht, siç e thotë ligji, nuk e lejoj.
Dhe ja ku jemi sot:
Panik. Sulme. Ulërima. Histeri politike.
E vërteta është e thjeshtë. Mërgata kurrë më të lehtë nuk e ka patur votimin. Përveç se zgjedhjet janë në fundvit, kur secili mund të jetë në atdhe; secili bashkëatdhetar që nuk vie këndej, mund të votojë në konsulatë e ambasadë të Republikës; shtetit tonë. Mund dhe të votojnë edhe me postë; secili në emrin e vet, me fletvotim jo të printuar por të pranuar nga shteti i vet.
E di se do ta bëjnë.
LDK po punon secilën ditë me ta. Regjistrohuni e ejani e votoni masivisht në Kosovë. Ne jemi të qetë!
Sekti i Vetëvendosjes nuk e do këtë. Ata duan të manipulojnë. T’i printojnë vet fletëvotimet. T’i mbushin vet. T’i manipulojnë votat vet. Të prodhojnë rezultatin që s’e marrin dot me besimin e qytetarëve.
Përse? Sepse e kanë kuptuar një të vërtetë të madhe:
Mërgata nuk mashtrohet më. Mërgata nuk blihet. Mërgata po ndryshon.
Mashtrimet e propagandat nuk kalojnë më! Jo më ndaj këtij vendi. Jo më në emër të mërgatës. Jo më ndaj demokracisë.
Kosova po zgjohet.
Mërgata po rikthehet.
E paniku i tyre është shenja e parë e humbjes së që i pret.