Ditën e sotme Presidenti francez Emmanuel Macron dhe homologu ukrainas Volodymyr Zelensky, kanë zhvilluar një takim në Paris.
Sipas mediave të huaja, Presidenti francez u ka thënë mediave se Rusia nuk ka treguar shenja se do t’i japë fund agresionit.
Macron shtoi se vetëm Ukraina mund të vendosë për territoret e saj kur bëhet fjalë për kompromise të mundshme në bisedimet e paqes të udhëhequra nga SHBA-të.
Ai tha se evropianët dhe aleatët e Ukrainës duhet të jenë rreth tryezës së negociatave për të siguruar garancitë e sigurisë dhe se duhet të ketë më shumë qartësi mbi gatishmërinë e Rusisë për të ecur përpara pas bisedimeve me Uashingtonin këtë javë.
Ndërkohë, Zelenskyy deklaroi se garancitë e sigurisë janë një përparësi për Ukrainën, si dhe ruajtja e sovranitetit.
Presidenti i Ukrainës shtoi se shpreson të flasë me homologun amerikan Donald Trump pas vizitës së Steve Witkoff në Rusi këtë javë.
Ai tha gjithashtu se Rusia nuk duhet të marrë asnjë shpërblim për luftën e saj në Ukrainë dhe këmbënguli se përparimet e raportuara të Moskës në vijën e frontit janë të ekzagjeruara.