Moldavia, e cila ndan kufi tokësor me Ukrainën, mbylli për një periudhë të shkurtër hapësirën e saj ajrore pas një tjetër depërtimi të dronëve në territorin e saj, njoftoi sot Ministria e Mbrojtjes. Presidentja moldave e dënoi incidentin, duke e cilësuar atë si një “sulm të hapur” të Rusisë kundër vendit fqinj.
Kjo ish-republikë sovjetike, që synon t’i bashkohet Bashkimit Europian, ka raportuar vazhdimisht shkelje të hapësirës së saj ajrore që prej fillimit të pushtimit rus në Ukrainë, në shkurt të vitit 2022.
Sipas Ministrisë së Mbrojtjes, hapësira ajrore e Moldavisë “u mbyll përkohësisht për rreth një orë e 10 minuta, mes orës 22:43 dhe 23:53 (me orën lokale), si masë emergjente, pasi dy dronë të panjohur fluturuan ilegalisht mbi territorin kombëtar, duke paraqitur kërcënim të menjëhershëm për sigurinë ajrore”.
Ministria shtoi se dronët e tipit Gerbera, model rus, nuk u kapën nga radaret moldave, por hyrja e tyre “u konfirmua nga autoritetet kufitare ukrainase”.
Nga Ministria e Brendshme u bë e ditur se “nuk u gjet asnjë objekt apo mbetje që të përbënte rrezik për popullsinë, dhe se të dy dronët e braktisën përfundimisht hapësirën ajrore moldave duke u rikthyer drejt brendësisë së territorit ukrainas”.
Dy avionë komercialë nga Parisi dhe Barcelona, me destinacion Kishinovin, u devijuan drejt një aeroporti në Rumani, ndërsa një tjetër avion që po përgatitej të nisej nga Kishinovi u mbajt përkohësisht në tokë.
“Moldavia dënon ashpër këto veprime të paligjshme dhe të rrezikshme, të cilat vunë në rrezik sigurinë e fluturimeve civile dhe jetët e qytetarëve”, deklaroi Ministria e Mbrojtjes, duke i cilësuar shkeljet si “akte armiqësore frikësimi dhe destabilizimi”.
Presidentja Maia Sandu dënoi goditjet ajrore ruse ndaj Ukrainës gjatë natës së kaluar, në një postim në platformën X, duke theksuar se “sulmi brutal 10-orësh” nuk përputhet me “gjuhën e diplomacisë dhe as me atë të një shteti që pretendon se po negocion paqen”.
“Gjatë rrugës për të vrarë civilë, dronët rusë kanë shkelur sërish hapësirën ajrore të Moldavisë. Ne i dënojmë këto sulme dhe qëndrojmë në krah të Ukrainës”, shtoi ajo.
Gjashtë dronë depërtuan në hapësirën ajrore moldave të martën e kaluar, dhe autoritetet njoftuan se një prej tyre u rrëzua në territorin e vendit.
Moldavia, e cila kufizohet edhe me Rumaninë, vend anëtar i NATO-s, thirri të mërkurën në Ministrinë e Jashtme ambasadorin rus në Kishinov për të dhënë shpjegime lidhur me rrëzimin e dronit.
Ambasadori Oleg Ozerov, i cili është thirrur disa herë për incidente të ngjashme, deklaroi se këto ngjarje synojnë të përkeqësojnë edhe më tej marrëdhëniet tashmë të tendosura mes Moskës dhe Kishinovit.