kfvanews
Kryetari i AAK-së, Ramush Haradinaj, ka shpallur fuqishëm mbështetjen e tij për kandidaturën për deputet të Kreshnik Smajlajt, një prej figurave më dinamike dhe më të përkushtuara të Prishtinës.
Në një reagim publik, Haradinaj vlerëson se Kreshnik Smajlaj është shembulli i sipërmarrësit modern që nuk u dorëzua asnjëherë përballë sfidave, por vazhdoi të investojë dhe të krijojë mundësi të reja për të rinjtë – në një kohë kur shumë të rinj po largohen nga vendi.
Haradinaj thekson se Smajlaj ka arritur të bëhet frymëzim për shumë prodhues vendorë dhe komunitetin e biznesit, falë punës së tij të palodhshme dhe përkushtimit të vazhdueshëm. Ai e cilëson rastin e Smajlajt si të veçantë, ndërsa e vendos atë në qendër të modelit të zhvillimit që i duhet Prishtinës dhe Kosovës.
Kreshnik Smajlaj ishte asambleisti më i votuar në Prishtinë nga lista e AAK-së në zgjedhjet e fundit lokale, ndërsa tani, sipas Haradinajt, kandidatura e tij për deputet është një hap natyral dhe i merituar drejt përgjegjësive më të mëdha në nivel qendror.
“Përkushtimi që ka e dallon nga të tjerët. Ai kthen shpresën, sjell energji dhe vizion për një Prishtinë dhe Kosovë të zhvilluar”, ka deklaruar ndër të tjera Haradinaj, duke i uruar suksese në garën për deputet dhe duke konfirmuar se Smajlaj do të jetë edhe shef i shtabit zgjedhor në kryeqytet.
AAK tashmë ka bërë të qartë se Smajlaj do të jetë një nga emrat kryesorë të fushatës në Prishtinë, me synim të sjellë votën e të rinjve, besimin qytetar dhe frymën e zhvillimit ekonomik për vendin.
