kfvanews
Policia e Kosovës ka konfirmuar arrestimin e Mustafa Ulu, me shtetësi turke, ndaj të cilit ishte lëshuar urdhër-arrest ndërkombëtar nga Interpoli.
Ulu dyshohej për përfshirje në vepra penale që lidhen me shfrytëzim të të miturve dhe privim të paligjshëm të lirisë.
Sipas njoftimit zyrtar, operacioni u realizua nga njësiti i specializuar FAST, në kuadër të Drejtorisë për Bashkëpunim Ndërkombëtar Policor, në bashkëpunim me njësi të tjera të Policisë.
Postimi i plotë:
Policia e Kosovës, Drejtoria për Bashkëpunim Ndërkombëtar Policor, përkatësisht njësiti i specializuar FAST, ka realizuar me sukses arrestimin e një personi të kërkuar me urdhër arrest ndërkombëtar.
Sot, më 26.11.2025, rreth orës 13:30, zyrtarët policorë të kësaj drejtorie, në koordinim me njësitë tjera relevante të Policisë së Kosovës, kanë ndaluar një person me shtetësi të huaj, i cili ishte i kërkuar nga INTERPOL-i me urdhër arrest ndërkombëtar të lëshuar nga autoritetet e një shteti tjetër, për dyshime lidhur me kryerjen e veprave penale që lidhen me shfrytëzim të miturve dhe privim të paligjshëm të lirisë.
Personi i arrestuar është shoqëruar për procedura të mëtejme, ndërsa me vendim të prokurorit kujdestar i është caktuar masa e ndalimit policor për 48 orë, për të vijuar pastaj me hapat e tjerë ligjorë sipas praktikave dhe marrëveshjeve ndërkombëtare për bashkëpunim policor.
Policia e Kosovës mbetet e përkushtuar në realizimin e detyrave ligjore dhe bashkëpunimin ndërkombëtar në funksion të sigurisë së përgjithshme dhe luftimit të krimit pa kufij.
