Presidentja Vjosa Osmani ka reaguar pas rastit të fundit të dhunës në Gadime të Ulët, ku një grua u sulmua me sëpatë nga ish-bashkëshorti i saj, pavarësisht se kishte një urdhër aktiv mbrojtjeje.
Në Ditën Ndërkombëtare për Eliminimin e Dhunës ndaj Grave, Osmani e cilësoi femicidin “krizë kombëtare” që po gërryen themelet e shoqërisë.
“Kur një urdhër mbrojtjeje mbetet letër, atëherë rreziku bëhet realitet. Dhe realiteti na vret. Numri i rasteve të dhunës ndaj grave dhe dhunës në familje po na e thotë troç: letrat nuk shpëtojnë jetë. Zbatimi, vendosmëria, reagimi pa vonesë – po! Sepse pas çdo shifre fshihet një jetë e thyer, një fëmijë i traumatizuar, një histori që nuk duhet të përsëritet kurrë më”, ka shkruar Osmani.
Ajo ka bërë thirrje për veprim, teksa ka thënë se askush që ushtron dhunë nuk duhet të ndihet i paprekshëm.
“Me përgjegjësi. Me kujdes. Pa asnjë tolerim. Ashtu siç e kërkon ligji. Ashtu siç e meriton çdo grua dhe vajzë në Republikën e Kosovës. Çdo hap i gabuar, çdo neglizhencë, çdo vonesë mund të jetë fatale. Askush që ushtron dhunë nuk duhet të ndihet i paprekshëm. Asnjë grua nuk duhet të mbetet e pambrojtur. Nuk ka kompromis kur bëhet fjalë për jetën dhe dinjitetin e grave”, ka shkruar Osmani.