kfvanews
Pas publikimit të lajmit, redaksia është kontaktuar nga një person që është prezantuar si pronar i kompanisë “Maxhari Tours”, megjithëse nuk e tregoi emrin.
Ky individ dha një deklaratë që bie ndesh fuqishëm me provat vizuale dhe kronologjinë e ngjarjeve, duke ngritur një sërë pikëpyetjesh thelbësore.
Qëndrimi i vetëm personit ishte se kompania e tij nuk është e përfshirë në rast. Ai pretendoi se autobusi, i kapur sot me 120 kg narkotikë, ishte shitur para katër muajsh një personi në Shqipëri.
Megjithatë, pronari i paidentifikuar refuzoi të tregonte emrin e blerësit.
Pronari refuzoi të komentonte dhe të jepte shpjegim për faktin se vetëm gjashtë orë para se të dilte lajmi për kapjen e drogës, i njëjti autobus (me po të njëjtën pamje) ishte postuar në faqen zyrtare të “Maxhari Tours” në Facebook si pjesë e flotës së tyre. Ky detaj e kundërshton direkt pretendimin për shitje katër muaj më parë.
Ai nuk dha asnjë shpjegim se pse autobusi mbante ende targa të Kosovës në momentin e ndalimit, si dhe pse targat 06-771-CK ishin të njëjta me ato që kompania përdor edhe në reklamat e saj, pavarësisht “ndërrimit të pronësisë” katër muaj më parë. Personi insistoi vetëm në versionin e tij: “Autobusi nuk është i kompanisë sime, e kam shitur para katër muajsh në Shqipëri.”
