Anëtarët e Këshillit Prokurorial të Kosovës, të cilët lëshuan mbledhjen ku u shkarkua ushtruesi i detyrës së Kryeprokurorit të Shtetit, Besim Kelmendi, kanë mbajtur një konferencë për media.
Ata deklaruan se shkarkimi i Kelmendit është i paligjshëm, transmeton KFVA.
Visar Krasniqi, anëtar i KPK-së, ftoi institucionet e drejtësisë të merren me rastin.
“Ftojmë institucionet relevante të vlerësojnë shkeljet e kryera nga anëtarët e Këshillit Prokurorial sot”, tha ai, duke ftuar që në rast të përfshihen edhe AKI, Policia e Kosovës, e partnerët ndërkombëtarë.
Në konferencë, ai tha se Besim Kelmendi vazhdon detyrën e tij.
“Kryeprokurori i shtetit, vazhdon detyrën përderisa nuk ekziston një vendim i ligjshëm. Vendimi i sotëm është pa efekt juridik, është i papranueshëm, i paligjshëm”, tha mes tjerash ai.
Ndryshe, Këshilli Prokurorial i Kosovës ka shkarkuar Besim Kelmendin nga pozita e ushtruesit të Detyrës së Kryeprokurorit të Shtetit.
Për shkarkimin e Besim Kelmendit votuan pesë anëtarë.
Në mbledhjen e Këshillit Prokurorial të Kosovës, u vendos që Agron Qalaj të emërohet u.d i Kryeprokurorit të Shtetit.