Presidentja e Kosovës, Vjosa Osmani, ka pritur sot në takim Komisionerin Parlamentar të Forcave të Armatosura të Gjermanisë, Henning Otte, me të cilin ka diskutuar mbi bashkëpunimin e thelluar mes dy shteteve në fushën e sigurisë dhe zhvillimit të kapaciteteve ushtarake.
Gjatë takimit, Presidentja Osmani ka shprehur mirënjohjen e thellë të Kosovës për mbështetjen e vazhdueshme që Gjermania dhe institucionet e saj – përfshirë Bundestagun dhe Bundeswehr-in – i kanë dhënë Forcës së Sigurisë së Kosovës në procesin dhjetëvjeçar të tranzicionit dhe profesionalizimit të saj.
“Presidentja Osmani me z. Otte, përveç tjerash, diskutuan edhe për mundësitë e rritjes së bashkëpunimit në mes dy institucioneve tona të komisionerëve parlamentar te forcave tona respektive, me shkëmbimin e përvojave profesionale, gjithnjë në funksion të forcimit të mekanizmave të llogaridhënies dhe transparencë si dhe avancimin e standardeve demokratike në forcat e armatosura respective”, thuhet në njoftimin e Presidencës.
“Në fund Presidentja Osmani tha se edhe me themelimin e institucionit të Komisionerit parlamentar të FSK-së, dëshmojmë se, rruga jonë drejt NATO-s është e bazuar në standard, përgjegjësi dhe vlera demokratike. FSK do të vazhdojë të zhvillohet e avancohet me përkushtim për të qenë shembull i një force mbrojtëse profesionale, etike, dhe të përgjegjshme plotësisht në zbatimin e misionit kushtetues dhe kompetencave ligjore të saj”, thuhet tutje në njoftimin e Presidencës.