Rusia ndërmori një sulm në shkallë të gjerë në Kiev mbrëmë, duke përdorur qindra raketa dhe dronë ndaj godinave civile.
Kryebashkiaku Vitali Klitschko raportoi se mbeturinat e një droni goditën një ndërtesë banimi pesëkatëshe në lagjen Dniprovskiy, ndërsa një zjarr shpërtheu në katin e dymbëdhjetë të një ndërtese tjetër.
Ushtria raportoi zjarre të tjera në katin e dhjetë të një ndërtese në lagjen Podilskyi dhe një tjetër në çatinë e një ndërtese pesëkatëshe në lagjen Solomianskyi.
Sipas autoriteteve ukrainase, deri në këto momente 1 person ka humbur jetën dhe 20 të tjerë kanë mbetur të lënduar si pasojë e sulmeve në kryeqytet, ku u raportuan ndërprerje të energjisë elektrike në disa lagje.
“Shumë ndërtesa të larta në të gjithë Kievin u goditën, praktikisht në çdo lagje”, tha Tymur Tkachenko, kreu i Administratës Ushtarake të qytetit.
Ndërkohë, dronët ukrainas goditën qytetin portual rus të Novorossiysk mbrëmë, duke dëmtuar një terminal nafte dhe duke shkaktuar një zjarr të madh, sipas burimeve lokale të cituara nga mediat e Kievit.
Sulmi thuhet se kishte në shënjestër kompleksin Sheskharis, një terminal i madh i eksportit të naftës për kompaninë shtetërore ruse të naftës Transneft. Një anije civile thuhet gjithashtu se u godit gjatë sulmit në port, me tre anëtarë të ekuipazhit të plagosur.