Shqipëria ka arritur një moment historik në futbollin europian, duke u bërë skuadra e parë nga kontinenti që siguron matematikisht pjesëmarrjen në fazën “play-off” të Kupës së Botës 2026. Fitorja 1-0 ndaj Andorrës jo vetëm vulosi vendin e dytë në Grupin K, por i hapi rrugë kuqezinjve drejt sfidave të marsit që do të vendosin fatin e biletës së madhe për Botërorin.
Në pritje të renditjes së FIFA-s dhe shortit
Tashmë, vëmendja është zhvendosur te pozicionimi në vazo për shortin e play-off-it. Shqipëria ndodhet aktualisht në Vazon 2, por gjithçka varet nga renditja e ardhshme e FIFA-s dhe rezultatet e ndeshjeve të fundit kualifikuese.
Qëndrimi në Vazon 2 do t’i siguronte kombëtares avantazh të madh: zhvillimin e ndeshjes së parë të play-off-it në shtëpi, ndaj një rivali nga Vazo 3.
Ndryshimet e fundit në renditje – kryesisht kalimi i Islandës mbi Ukrainën – kanë prekur edhe pozicionimin e Shqipërisë, duke krijuar një panoramë të re të mundshme të vazove.
Rivalët që mund t’i dalin përpara Shqipërisë
Nëse situata aktuale mbetet e pandryshuar, kuqezinjtë mund të përballen në gjysmëfinale të play-off-it me një nga këto kombëtare:
Maqedonia e Veriut
Islanda
Bosnjë-Hercegovina
Kosova
Megjithatë, çdo gjë mbetet e hapur deri pas përfundimit të ndeshjeve të mbetura të kualifikimeve.
Vazot aktuale të play-off-it:
Vazo 1: Itali, Turqi, Poloni, Hungari
Vazo 2: Skoci, Çeki, Sllovaki, Shqipëri
Vazo 3: Maqedoni e Veriut, Islandë, Bosnjë-Hercegovinë, Kosovë
Vazo 4: Uells, Rumani, Suedi, Irlandë e Veriut.