Prokuroria Speciale e Republikës së Kosovës ka filluar hetimet lidhur me konkursin e anuluar nga Universiteti i Prishtinës “Hasan Prishtina”, rast për të cilin ka raportuar gazeta javën qe shkoi, ku u ngritën dyshime serioze për konflikt interesi, kur ushtruesi i detyrës së sekretarit të përgjithshëm, Safet Thaçi, kishte anuluar një konkurs në UP në të cilin kishte qenë vetë kandidat.
Burime të Reporteri.net në Prokurori, bëjnë të ditur se Prokuroria ka autorizuar Policinë e Kosovës të sigurojë nga Rektorati të gjithë dokumentacionin që lidhet me konkurset e mbajtura gjatë muajve maj dhe qershor të vitit 2025. Këto konkurse kishin për qëllim plotësimin e 32 vendeve të lira të punës në administratën e universitetit.
Gazeta ka kërkuar nga Prokuroria Speciale detaje shtesë mbi personat që janë objekt i hetimeve, por deri në momentin e publikimit nuk ka marrë përgjigje.
Procesi i rekrutimit, i nisur në fund të qershorit 2025, ishte zhvilluar në tri faza: verifikimi i dokumentacionit, testi me shkrim dhe intervista me gojë. Në mesin e aplikantëve për mbi 20 pozita administrative ishte edhe Safet Thaçi, zyrtar ligjor në këtë institucion. Dokumentet e siguruara nga Reporteri.net tregojnë se ai kishte kaluar me sukses dy fazat e para, por kishte dështuar në intervistën me gojë, duke mos u përzgjedhur për pozitën e Sekretarit të Fakultetit Filozofik.
Megjithatë, zhvillimet që pasuan e bënë rastin edhe më të pazakontë. Në fund të shtatorit 2025, Këshilli Drejtues i Universitetit të Prishtinës, i kryesuar nga Altin Sahiti, u mblodh sërish – edhe pse Sahiti kishte dhënë dorëheqje më 20 korrik, e cila, sipas Ligjit për Zyrtarët Publikë, duhej të hynte në fuqi më 20 gusht.
Në këtë mbledhje, u vendos që Safet Thaçi të caktohej ushtrues detyre i sekretarit të përgjithshëm të UP-së. E menjëherë pas marrjes së kësaj pozite, Thaçi anuloi konkursin në të cilin kishte marrë pjesë vetë, veprim që ka ngritur dyshime të forta për konflikt interesi, e që tashmë është bërë objekt hetimi nga Prokuroria Speciale.