Ditëve të fundit Kosova ka ndaluar importin e produkteve të shpezëve nga disa shtete, gjë që si duket menjëherë ka ndikuar edhe në çmimin e vezëve.
Në marketet e Kosovës, një kuti me 30 copë vezë tani raportohet se kushton 5 euro, një tjetër rritje që ndjehet në shportën e përditshme të qytetarëve.
Duket se rritjen e çmimit e ka ndikuar vendimi që Agjencia e Ushqimit dhe Veterinarisë së Kosovës, ka marrë për të ndaluar importin e shpezëve dhe produkteve të tyre nga disa vende të BE-së, pas shpërthimit të gripit të shpezëve.
Përpos ndalimit të importit, AUV raportoi të mërkurën edhe për gjetje të salmonellës në importe nga Rumani, diku rreth 30 kilogramë të mishit të pulës.