kfvanews
Në një adresë në Budva, vetëm në dy ndërtesa biznesi, janë të regjistruara një numër i pabesueshëm prej 2.606 kompanish, sipas të dhënave nga regjistri publik i Regjistrit Qendror të Subjekteve Ekonomike (CRPS).
Sipas informacioneve nga disa burime, shkruan portali podgoricës Borba, bëhet fjalë për kompani fiktive, një pjesë e madhe e të cilave janë në pronësi të shtetasve turq dhe ekzistojnë vetëm “në letër”, duke përdorur si mburojë për qëndrimin dhe marrjen e lejeve në Mal të Zi.
Në ndërtesat që ndodhen midis Sekretariatit për Urbanizëm të Komunës së Budvës dhe Drejtorisë së të Ardhurave, sipas të dhënave të disponueshme, janë të regjistruara mijëra kompani që nuk kanë asnjë hapësirë të vërtetë biznesi, punonjës apo aktivitet ekonomik.
Shumica e tyre përdorin të njëjtat adresa dhe të dhëna kontakti, ndërsa disa kompani ndajnë të njëjtët përfaqësues ose përfaqësues ligjorë.
Në terren mund të vërehet se në këto objekte janë të vendosura agjenci që ofrojnë “asistencë biznesi”, pra regjistrimin fiktiv të kompanive për shtetas të huaj.
Në praktikë, shtetasit e huaj, kryesisht nga Turqia, themelojnë një kompani me kapital minimal (një euro), duke krijuar kështu bazën për marrjen e lejes së përkohshme të qëndrimit.
Sipas burimeve anonime të portalit nga sektori i biznesit në Budvë, këto kompani “ekzistojnë vetëm në letër”, dhe qëllimi i tyre i vërtetë është të mundësojnë qëndrim të ligjshëm në vend.
“Në një adresë mund të keni edhe njëqind kompani që nuk kanë bërë asnjëherë deklaratë tatimore. Bëhet fjalë për një mekanizëm që përdoret në të gjithë bregdetin, por Budva është epiqendra”, thotë një inspektor tatimor, i cili dëshiron të mbetet anonim.
