Pas vendimit të Panelit Zgjedhor për Ankesa dhe Parashtresa (PZAP), i cili refuzoi si të pabazuar ankesën e Lëvizjes Vetëvendosje kundër Lidhjes Demokratike të Kosovës për pretendimet e shkeljes së heshtjes zgjedhore në Prishtinë, ka reaguar zëdhënësi i LDK-së, Besian Mustafa.
Në një postim në rrjete sociale, Mustafa ka komentuar me tone ironike vendimin e PZAP kundër LDK-së që kishte të bënte me rastine e fotografimit të aktivistit të LDK-së nga ministri në detyrë i Punëve të Brendshme, Xhelal Sveçla.
“PZAP konfirmon që Xhelali me sjellje mangupi nuk kalon!”, ka shkruar ai.
Ky reagim vjen pasi PZAP ka konstatuar se në provat e dorëzuara nga Vetëvendosje nuk ka pasur elemente që dëshmojnë shkelje ligjore nga ana e LDK-së, ndërsa ka theksuar se ngjarja e përmendur ka ndodhur në hapësirë publike dhe jo në ambientet e qendrës së votimit.