kfvanews
Kryeministri në detyrë, Albin Kurti, ka folur sot para gazetarëve pas vizitës në Institutin për Krime Lufte, ku u pyet nëse po zhvillohen bisedime me parti apo deputetë për formimin e qeverisë së re.
Ai tha se mandati për formimin e qeverisë i është dorëzuar tashmë Glauk Konjufcës nga presidentja Vjosa Osmani, dhe se procesi ka edhe dhjetë ditë kohë për të marrë drejtim.
“Mandati i është dhënë Glauk Konjufcës nga VV. Ne urojmë për më të mirën. E ritheksojmë: nuk mendojmë se është punë e mençur të shkojmë në zgjedhje edhe në dhjetor edhe pastaj sërish në prill”, tha Kurti.
Ai theksoi se deputetët duhet të vendosin mes dy opsioneve të mundshme: sipas tij, ose një qeveri Kurti që do të zgjasë deri në dhjetor, ose një qeveri nën udhëheqjen e Konjufcës që do të zgjasë deri në prill.
“Kështu që deputetët janë para përzgjedhjes: ose Kurti 2.5 deri në dhjetor, ose Konjufca 1 deri në prill. Pa njërën prej tyre nuk është e mundur. Duhet të përcaktohen për njërën”, u shpreh ai.
Kurti shtoi se pret që gjatë kësaj jave dhe fillimit të javës së ardhshme të ketë më shumë qartësi rreth situatës, ndërsa nënvizoi se mbajtja e dy palë zgjedhjeve në një periudhë kaq të shkurtër do të ishte e paarsyeshme.
