Komuna e Prishtinës ka njoftuar se rojekti i instalimit të kamerave të sigurisë në kryeqytet është në fazën e fundit.
Në kuadër të fazës së fundit të projektit për rritjen e sigurisë publike në Kryeqytet, komuna ka bërë me dije se janë instaluar: 24 kamera me njohje automatike të targave (ANPR), 6 kamera videovezhguese multisensor dhe 1 kamerë rrotulluese PTZ.
Kamerat janë vendosur në këto pika strategjike: Veternik – te “Shelli”, Veternik – te ura, Veternik – rruga kryesore (magjistralja Prishtinë–Ferizaj) Rr. “B” – rrethi te Maxi, Rr. “B” – rrethi te barnatoret, Shkolla “Pavarësia”, Hyrja/dalja te tuneli nën Kurriz, Shkolla Ekonomike dhe Te ura – rruga për Fushë Kosovë
“Gjithashtu, në pikat ekzistuese janë shtuar kamera të reja ANPR për mbulim më efikas dhe monitorim të vazhdueshëm të trafikut dhe sigurisë publike. Deri më tani, janë instaluar gjithsej 165 kamera sigurie në 54 lokacione të ndryshme të Kryeqytetit. Ky është projekt i përbashkët i Policisë së Kosovës dhe Drejtorisë për Siguri dhe Emergjenca të Kryeqytetit, si pjesë e strategjisë për forcimin e sigurisë publike dhe menaxhimin e integruar të trafikut urban. Ky është një hap tjetër drejt një Kryeqyteti më të sigurt, më të monitoruar dhe më të mençur”, thuhet në njoftim.