kfvanews
Gjermania priti sot avionin e saj të parë të patrullës detare P-8A Poseidon, i cili u ul në aeroportin kryesor të kryeqytetit dhe u mirëprit personalisht nga Ministri i Mbrojtjes, Boris Pistorius.
Avioni, i projektuar për zbulimin dhe luftimin e nëndetëseve ruse në Atlantikun e Veriut, është i pari nga tetë që do të dorëzohen deri në vitin 2028. Programi ka një vlerë prej 3.1 miliardë eurosh.
I bazuar në modelin Boeing 737, Poseidon ka rreze fluturimi mbi 7,000 kilometra dhe mund të mbajë pesë torpedo MK-54 si dhe katër raketa anti-anije AGM-84 Harpoon.
“P-8 do të forcojë ndjeshëm aftësitë tona për zbulim dhe mbikëqyrje detare, sidomos kundër nëndetëseve armike,”
— deklaroi Inspektori i Marinës gjermane, Jan Christian Kaack, duke e quajtur avionin një “roje fluturuese”.
Avioni përdor shama sonare dhe sensorë akustikë nënujore për të lokalizuar nëndetëse konvencionale dhe bërthamore, si dhe ka aftësi për të sulmuar objektiva tokësore.
Gjermania synon ta dislokojë Poseidon-in në hendekun midis Groenlandës, Islandës dhe Mbretërisë së Bashkuar, një zonë strategjike për NATO-n, ku mund të monitorohen lëvizjet e flotës ruse.
Ekuipazhi përbëhet nga tre pilotë, dy koordinatorë taktikë dhe gjashtë operatorë sensorësh. Avioni do të bazohet në Nordholz, në rrethin e Cuxhaven, një bazë e rëndësishme e zbulimit të NATO-s.
Marrëveshja e vitit 2024 me Mbretërinë e Bashkuar — e njohur si Trinity House Agreement — parashikon patrulla të përbashkëta në Detin e Veriut dhe Atlantikun e Veriut, me avionët gjermanë që do të operojnë gjithashtu nga baza britanike Lossiemouth në Skoci.
Partnerët e tjerë të NATO-s, përfshirë SHBA-në, Norvegjinë dhe Britaninë e Madhe, tashmë përdorin P-8 Poseidon për misione të ngjashme.
Ky avion modern do të zëvendësojë flotën gjermane P-3C Orion, të cilët janë mbi 40 vjeç dhe po dalin nga përdorimi pas dekadash shërbimi.
