kfvanews
Dy vëllezër janë vrarë sot në fshatin Golluboc të Malishevës, teksa i dyshuar është dhëndri i tyre.
Policia ka rrethuar vendin e ngjarjes, teksa nga pamjet live në media shihen shenja gjaku në një veturë që ndodhet tek vendi ku u krye vrasja e dyfishtë.
I dyshuari ndodhet ende në arrati. Kërkimet për të po vazhdojnë ende, me aktivizimin edhe të Njësisë K9.
Nga Prokuroria Themelore e Gjakovës kanë deklaruar se po ndërmerren të gjitha veprimet për sigurimin e provave në këtë çështje.
“Ju njoftojmë se në lidhje me rastin në vendin e ngjarjes kanë dalë të gjitha njësitet e nevojshme të policisë, Kryeprokurori dhe Prokurori Kujdestar. Sipas udhëzimeve të prokurorit kujdestar, policia është duke ndërmarrë të gjitha veprimet për sigurimin e provave në këtë çështje penale”, ka deklaruar Drin Domi nga kjo prokurori.
Gazeta merr vesh se viktimat janë një 30-vjeçar dhe një 40 vjeçar.
Në raportin e Policisë u bë e ditur se rreth orës 11:30, viktimat u dërguan në Qendrën e Mjekësisë Familjare në Kijevë, ku më pas mjekët konstatuan vdekjen e tyre.
“Rreth orës 11:30, jemi njoftuar se dy persona të gjinisë mashkullore, të moshës madhore (vëllezër), janë dërguar në QMF-në e Kijevës si pasojë e plagëve të marra nga arma e zjarrit në fshatin Golluboc të Malishevës. Personeli mjekësor në QMF ka konstatuar vdekjen e viktimave. Njësitë e nevojshme policore i janë përgjigjur menjëherë rastit dhe kanë dalë në vendin e ngjarjes”, thuhet në raport.
