kfvanews
Mesfushori me prejardhje shqiptare, Granit Xhaka, po vazhdon të tregojë se përvoja dhe lidershipi i tij mbeten të çmuara në futbollin anglez. Mbrëmë, Xhaka zhvilloi një paraqitje të jashtëzakonshme ndaj Evertonit, duke qenë një nga lojtarët më të spikatur në fushë dhe duke shënuar golin e tij të parë në Premier League pas rikthimit.
Ndeshja përfundoi me rezultatin 1-1, por për Xhakën ishte një mbrëmje për t’u mbajtur mend. Ai u vlerësua si “Lojtari i ndeshjes” nga dy prej platformave më të njohura statistikore, Flashscore dhe SofaScore, duke konfirmuar ndikimin e tij të madh në lojën e ekipit.
Pas ndeshjes, Xhaka foli për Sky Sport, ku u shpreh i zhgënjyer për mënyrën si skuadra e nisi takimin, por edhe optimist për rrugëtimin në vazhdim.
“E nisëm ndeshjen sikur të kishim mbaruar stërvitjen dje. Nuk mjaftoi! Besoj se si stërvitesh luan.”
Megjithatë, ai nuk e fshehu gëzimin për rikthimin në elitën e futbollit anglez:
“Jam i lumtur që jam rikthyer në Premier League dhe shpresoj se mund t’i ndihmoj djemtë me përvojën time ditë pas dite.”
Pas një periudhe të suksesshme në Bundesligë, rikthimi i Xhakës në Angli po shihet si një hap pozitiv si për të, ashtu edhe për klubin e tij aktual, që tashmë duket se po përfiton nga stabiliteti dhe përvoja e mesfushorit 32-vjeçar.
