Kryetari i PDK-së, Memli Krasniqi, ka reaguar pas mbledhjes së sotme të qeverisë në detyrë, ku deputeti Albin Kurti përmendi rritje të pagave dhe pensioneve.
Krasniqi e ka quajtur këtë “tentativë për mashtrim elektoral”, në prag të balotazhit dhe zgjedhjeve parlamentare.
Ai ka thënë se për pesë vite qeverisje nuk është realizuar ajo që sot u premtua, duke theksuar se besimi i qytetarëve nuk mund të rikthehet me premtime të minutës së fundit.
“Thesi i mashtrimeve të një “babadimri” që kurrë s’erdhi për qytetarët e Kosovës, sado që premtoi çdo vit për pesë vjet, s’mundet me e rikthy besimin e humbur te qytetarëve e as nuk mund te arrijë qëllimin e blerjës së votës për balotazh dhe për zgjedhje parlamentare.
Krejt ato që sot u thanë në mbledhjen e fundit të kësaj qeverie, e që s’u bënë pesë vjet me radhë, do të bëhen: më mirë, më shumë e më shpejt, por me qeverinë e ardhshme, pa Albin Kurtin e pa Vetëvendosjen.
Mashtrimi elektoral nuk kalon. Uji i turbullt s’pihet dy herë!”, shkroi Krasniqi.