Uragani jashtëzakonisht i fuqishëm Melissa po shkon drejt Kubës pasi shkatërroi Xhamajkën. Është stuhia më e fuqishme me të cilën është përballur ndonjëherë ky komb ishullor.

Deri më tani nuk janë konfirmuar vdekje, por pjesa më e madhe e Xhamajkës është pa energji elektrike dhe internet, dhe duke pasur parasysh forcën e stuhisë dhe shkallën e dëmeve, pritet të ketë më shumë.

Qendra Kombëtare e Uraganeve njoftoi se Melissa është dobësuar pak dhe tani është një uragan i Kategorisë 3, me erëra deri në 190 kilometra në orë.

Pavarësisht kësaj, pritet të mbetet një uragan i fuqishëm ndërsa lëviz mbi Kubë dhe Bahamas dhe kalon pranë Bermudës.

Qendra Kombëtare e Uraganeve njoftoi se Melissa së shpejti do ta godasë Kubën si një “uragan jashtëzakonisht i rrezikshëm i kategorisë më të lartë”.

Kryeministri i Xhamajkës, Andrew Holness, tha se raportet fillestare treguan efektet shkatërruese të uraganit Melissa në ishull.

“Deri më tani kemi raportime për spitale të dëmtuara dhe dëme të mëdha në shtëpi dhe biznese”, tha Holness për CNN.

Ai shtoi se jugperëndimi i vendit, përfshirë Qarkun St. Elizabeth, ishte në “korridorin e ndikimit” përpara se uragani të lëvizte në veriperëndim.

Ende nuk ka vdekje të konfirmuara, por duke pasur parasysh forcën e stuhisë dhe shkallën e dëmit, Holness tha se “për fat të keq pret që të ketë”.

Presidenti kubanez Miguel Díaz-Canel njoftoi se më shumë se 735,000 njerëz në të gjithë vendin janë evakuuar për shkak të uraganit Melissa.

“Do të jetë një natë shumë e vështirë për të gjithë Kubën, por ne do të rikuperohemi, me besimin në fitoren që Fideli dhe Rauli na ngulitën”, tha ai, duke iu referuar vëllezërve Castro, ish-udhëheqësve të vendit.

Agjencitë e ndihmës po presin të shohin shkallën e shkatërrimit që ka lënë pas Melissa. Brian Bogart i Programit Botëror të Ushqimit i tha BBC-së se stuhia do të jetë një nga katastrofat më të mëdha në historinë e rajonit.