kfvanews
Kryeministri në detyrë, Albin Kurti, ka qenë i ftuar të martën mbrëma në darkën e shtruar nga Qarku Diplomatik i Parisit, ku të pranishëm ishin personalitete diplomatike, politike dhe ekonomike të Francës. Aty e shfrytëzoi mundësinë t’u tregojë francezëve për interesat e Europës.
Në njoftimin e lëshuar nga Zyra e Kryeministrit është thënë se Kurti shprehu falënderim për ftesën, një ditë para Forumit të Paqes në Paris, i cili mbledh liderë nga e gjithë bota.
Kurti në këtë darkë foli për rëndësinë e angazhimit dhe vlerën e shtuar të anëtarësimit të Kosovës dhe gjithë Ballkanit Perëndimor në Bashkimin Evropian dhe NATO.
“Ai tha se anëtarësimi i Ballkanit Perëndimor në Bashkimin Evropian është në vetë interesin ekonomik dhe të sigurisë të Bashkimit Evropian dhe shteteve anëtare të tij. Në këtë drejtim, ai shtoi se u përket atyre që besojnë se zgjerimi i jashtëm i Bashkimit Evropian dhe reformat e brendshme të tij shkojnë krah për krah. Vetëm një Evropë që dëshiron të reformohet nga brenda mund të zgjerohet nga jashtë, dhe vetëm një Evropë që dëshiron të zgjerohet nga jashtë mund të reformohet suksesshëm nga brenda; zgjerimi i jashtëm dhe reformat e brendshme janë njëkohësisht mundësi dhe kushte të njëra-tjetrës, u shpreh kryeministri”, thuhet në komunikatë.
Kurti të mërkurën merr pjesë në edicionin e tetë të Forumit të Paqes në Paris, me ftesë të Presidentit të Republikës së Francës, Emmanuel Macron.
