kfvanews
Britania e ka sanksionuar një rrjet kosovar që e akuzon për falsifikim dokumentesh për banda kriminale, e që ishin përdorur më pas për trafikimin e njerëzve, shkruan KFVA.
Sipas njoftimit të Qeverisë britanike, “Rrjeti Krasniqi”, përshkruhet si një bandë kriminale me seli në Kosovë, që kishte udhëhequr një laborator të sofistikuar për prodhimin e dokumenteve false.
Aty thuhet se grupi ka krijuar pasaporta false, letërnjoftime dhe patentë-shoferë të më shumë se 50 shteteve, përfshirë të Mbretërisë së Bashkuar.
Të sanksionuarit janë:
Burim Krasniqi, udhëheqësi i rrjetit Krasniqi.
Arif Krasniqi, ndërmjetës i grupit që siguronte klientë për shërbimet e tyre.
Flamur Krasniqi, anëtar i grupit që u gjet në posedim të dokumenteve të falsifikuara.
Valon Krasniqi, i përfshirë në prodhimin e dokumenteve të falsifikuara.
Sami Duriqi, i përfshirë në prodhimin e dokumenteve të falsifikuara.
Granit Avdyli, i përfshirë në prodhimin e dokumenteve dhe reklamimin e shërbimeve të grupit.
Nexhmije Selmani, ka siguruar ambiente të përdorura nga grupi për falsifikimin e dokumenteve dhe është përfshirë në sigurimin e pajisjeve për falsifikim.
Endrit Ermellahu, i përfshirë në prodhimin e dokumenteve të falsifikuara.
Shkembim Ermellahu, anëtar i grupit që u gjet në posedim të dokumenteve të falsifikuara
Ata janë ndaluar të udhëtojnë drejt Mbretërisë së Bashkuar dhe janë përjashtuar nga sistemi financiar britanik, si pjesë e fushatës së qeverisë kundër bandave që shfrytëzojnë një rrugë kyçe tranziti për migrimin e paligjshëm.
Mbretëria e Bashkuar po ashtu ka sanksionuar Nusret Seferoviq, që e cilësoi si udhëheqës të një bande kroate, që kishte furnizuar bandat në Ballkan me pasaporta të falsifikuara kroate.
Dy persona të tjerë dhe një kompani tregtare u sanksionuan për pjesëmarrjen e tyre në një rrjet që transferonte para dhe blinte pjesë të anijeve të vogla, të përdorura nga bandat për të lehtësuar migrimin e paligjshëm, u tha në njoftimin e Qeverisë britanike.
Britania tha se k;to sanksione janë hapi i fundit në luftimin e rrjeteve kriminale që kanë rritur migrimin ilegal në këtë shtet. Këto veprime, tha Qeveria britanike, kanë ndihmuar që të ulet numri i migrantëve nga Ballkani Perëndimor nga 140.000 më 2022 në 21.000 vitin e kaluar.
