Kryeministri në detyrë i Kosovës, Albin Kurti aktualisht gjendet në Britani të Madhe, ku po merr pjesë në Samitin e Procesit të Berlinit.

Para këtij Samiti, kryetari i LVV-së zhvilloi një takim me mërgatën ku ka zbuluar ofertën që ia ka bërë Nismës për bashkëqeverisje.

Ai tha se kësaj partie ka qenë i gatshëm të ia japë katër pozita të larta, edhe pse i ka vetëm tre deputetë.

“Kam qenë i gatshëm që Nismës të ia jap me tre deputetë, një ministër, nënkryetarin e Kuvendit, po të ishte bërë Albulena Haxhiu kryetare e Parlamentit, Fatmir Limaj do të ishte nënkryetar, sepse duhet kryetari dhe nënkryetari me qenë të gjinive të ndryshme. Paramendojeni këtë situatë ku Haxhiu bëhet kryetare e Kuvendit, Limaj bëhet nënkryetar se i ka pasur pesëfish vota më pak se Haxhiu, e kish marrë një Ministri dhe dy zëvendësministra”, tha Kurti.

“Kjo është racionale, maksimumi ku mund të shkojmë”, u shpreh tutje Kryeministri në detyrë para diasporës shqiptare në Londër.

Kurse, deputetja e Nismës, Xhevahire Izmaku ditë më parë tha se partia është e gatshme për bisedime me Vetëvendosjen, por ka një kusht.

Ajo nënvizoi nevojën që të “sqarohet pozita e kryetarit të Kuvendit”, pasi sipas saj, legjislativi nuk duhet të funksionojë me një figurë e cila ka krijuar përçarje.