kfvanews
Austria tha të shtunën se do të bie dakord me paketën e fundit të sanksioneve të Bashkimit Evropian kundër Rusisë, duke ndryshuar qëndrimin e saj të mëparshëm dhe duke hequr një pengesë kyçe përpara një votimi në fillim të javës së ardhshme, shkruan Reuters.
Ministrat e Jashtëm të BE-së do të mblidhen të hënën në Luksemburg, ku shpresojnë të finalizojnë paketën e 19-të të sanksioneve të bllokut kundër Moskës për pushtimin e Ukrainës, transmeton Telegrafi.
Reuters raportoi më parë këtë muaj se miratimi i paketës ishte bllokuar sepse Austria po kërkonte që BE të zhbllokonte disa asete ruse, për të kompensuar Raiffeisen Bank International të Austrisë për penalitetet e vendosura nga Rusia.
Por qeveritë e tjera të BE-së nuk do të pajtoheshin. Paketa ka nevojë për mbështetje unanime nga 27 shtetet anëtare të BE-së.
“Austria mbështet presionin e vazhdueshëm ndaj Rusisë dhe do të miratojë paketën e 19-të të sanksioneve të hënën”, tha ministria e Jashtme e vendit në një deklaratë.
Paketa e sanksioneve përfshin një sërë masash energjetike dhe financiare, duke përfshirë një ndalim të gazit natyror të lëngshëm rus nga 1 janari 2027, duke e çuar datën përpara 1 janarit 2028.
Sllovakia gjithashtu ka shprehur rezerva për këtë, por katër diplomatë të BE-së thanë se Komisioni Evropian pritej të lëshonte një letër të hënën që duhet të adresonte shqetësimet e Sllovakisë.
