Gazetari i njohur hulumtues italian ka qenë cak i një sulmi me bombë, raporton “The Guardian”, përcjell KFVA.

Sigfrido Ranucci, moderator i “Report”, program hulumtues që transmetohet në televizionin publik, Rai, ka thënë se shpërthimi ka ndodhur rreth 20 minuta pas mbërritjes në shtëpinë e tij në Campo Ascolano, afër Romës, mbrëmjen e djeshme.

Shpërthimi ka shkatërruar pjesërisht edhe një makinë që ishte e së bijës së Ranuccit. Askush nuk është lënduar nga sulmi, dhe policia anti-mafi në Romë menjëherë ka nisur hetimet.

Bomba, me gjasë e prodhuar me fishekzjarre, ishte vendosur ndërmjet dy vazove para shtëpisë së Ranuccit, kanë bërë të ditur raportet në shtypin italian të premten në mëngjes, më 17.10.2025, duke iu referuar burimeve policore. Pajisja nuk ishte aktivizuar nga distanca, dhe me gjasë ishte aktivizuar prej një fitili të ndezur.

Ranuçi, i cili prej vitesh është nën mbrojtjen e policisë për shkak të kërcënimeve që i janë bërë, u tha gazetarëve se dëgjoi ‘një shpërthim të fuqishëm’, duke shtuar se shpërthimi ishte aq i fortë sa mund të kishte vrarë një kalimtar.