kfvanews
Granit Xhaka, ish-kapiten i Bayer Leverkusen-it dhe një nga lojtarët që ka luajtur më afër Florian Wirtz-it gjatë viteve të fundit, ka dhënë një vlerësim të lartë për mesfushorin e ri gjerman, tashmë pjesë e Liverpool-it.
Në një intervistë të fundit, mesfushori i Sunderland-it e ka cilësuar Wirtz-in si një nga talentet më të mëdhenj që ka parë ndonjëherë në rolin e numrit 10.
“Mes Cole Palmer dhe Florian Wirtz, por unë do të thosha Florian Wirtz,” – tha Xhaka. “Kam pasur fatin të jem me të për tri vite dhe mund t’ju them se është i pabesueshëm, jo vetëm me topin, por edhe në punën që bën pa top. Nuk kam parë shumë numra 10 që luajnë në nivelin e tij, si me topin ashtu edhe pa të.”
Xhaka theksoi se Wirtz, pavarësisht moshës së re (20-21 vjeç), ka një mentalitet të jashtëzakonshëm pune:
“Është gjithmonë i përkushtuar, punon çdo ditë për t’u përmirësuar, para dhe pas stërvitjes, dhe zemërohet kur nuk fiton as një seancë stërvitore. Ky është Florian Wirtz.”
Xhaka shtoi se edhe pse e vlerëson shumë Palmer-ine Chelsea-t, e di nga përvoja e drejtpërdrejtë se Wirtz ka potencialin për të shkëlqyer në Premier League:
“E njoh mirë dhe e di sa shumë mund t’i japë futbollit anglez. Shpresoj vetëm që të mos luajë mirë kundër nesh, Sunderland-it,” – tha me humor Xhaka, – “por për pjesën tjetër të sezonit i uroj çdo të mirë, sepse e meriton vërtet.”
