Analistët e mediave ndërkombëtare janë të ndarë në qëndrime sa i përket angazhimit të Donald Trump për luftën në Gaza.

Shumë prej tyre shprehen se fjalimet e Trump në parlamentin izraelit dhe në Egjipt ishin organizuar për të kënaqur egon e presidentit. Të tjerë pohuan se nga lëvizja “Amerika e para” është bërë “Trump i pari”.

Referuar shkrimit të analistit Jeremy Bowen, BBC ka publikuar një artikull ku shkruan se roli i Trump për armëpushimin në Gaza ishte vendimtar, por jo një udhërrëfyes për paqen.

Më tej aty shpjegohet pozicionimi i Trump në çështjet globale dhe mes rreshtash shkruhet se: “Marrëveshja ishte për një armëpushim dhe një shkëmbim pengjesh me të burgosur. Nuk është një marrëveshje paqeje, apo edhe fillimi i një procesi paqeje.”

Sipas CNN, armëpushimi në Gaza mund të mos jetë fundi i luftës. Nga analiza e publikuar ngrihen dy pyetje të mëdha që vënë në dyshim sigurinë në Lindjen e Mesme, pavarësisht se kreu i Shtëpisë së Bardhë është shprehur i bindur se mizoritë dhe sulmet kanë përfunduar, përcjell KFVA.

“A do të thotë vërtet se ‘lufta në Gaza ka mbaruar’? Apo është kjo hiperbola tipike e Trumpit?”, shkruhet në analizën e publikuar nga CNN.

Bazuar në karakterin e paqëndrueshëm të liderit amerikan, Sky News thotë se Trump ka fokusin e “një peshku të artë”, që do të thotë se vëmendja e tij në këtë çështje mund të devijojë në çdo moment.
Sipas Sky News, nëse gjërat nuk shkojnë ashtu siç ai dëshiron, Trump largohet dhe fajëson dikë tjetër.

Një tjetër reagim i Trump është diskutuar gjerësisht. Fotoja që revista “Times” kishte zgjedhur në faqen e parë të kopertinës ka shkaktuar zemërimin e presidentit Trump.

Ai tha se fotoja ishte më e keqja e të gjitha kohërave. “M’i kanë zhdukur flokët”, shtoi më tej Trump.

Në mes të kritikave dhe vlerësimeve, Shtetet e Bashkuara të Amerikës luajnë një rol kryesor në çështjet politike në kontinentin evropian dhe më gjerë.