Në një qendër votimi në fshatin Sallagrazhdë të Suharekës janë ngritur dyshime për manipulim me vota, i njohur ndryshe si rasti i “treni bullgar”.

Gjatë procesit të verifikimit në Qendrën e Numërimit në Suharekë është konstatuar se në njërën nga kutitë e votimit të kësaj qendre janë gjetur më shumë fletëvotime sesa nënshkrime në regjistrin e votuesve.

Bëhet fjalë për kutinë me numër 2404/01, e cila tashmë është karantinuar dhe lidhet me votimet për Asamblenë Komunale të Suharekës,

Për këtë mospërputhje, rasti është raportuar për hetim nga komisionerët zgjedhorë.

Ndërkohë, gjatë ditës së zgjedhjeve në të njëjtin fshat kishte ndërhyrë Policia e Kosovës pas raportimeve për presion të mundshëm ndaj votuesve.

“Treni bullgar” është një metodë e mashtrimit elektoral që përdoret për të manipuluar procesin e votimit.

Në këtë praktikë, personave të caktuar u jepet një fletëvotim i plotësuar paraprakisht nga organizatorët e mashtrimit. Votuesi shkon në vendvotim me këtë fletëvotim të mbushur, e hedh në kuti dhe nxjerr jashtë fletëvotimin bosh që e merr në mënyrë të rregullt nga komisionerët.

Pastaj, ky fletëvotim bosh i dorëzohet organizatorit, i cili e plotëson sipas interesit të tij dhe ia jep votuesit tjetër për ta futur në kuti — duke krijuar kështu një “zinxhir” votash të manipuluara, që ngjan me një tren (prej nga vjen emri).