Të premten me fillim nga ora 10 do të mbahet vazhdimi i seancës konstituive në përpjekje për ta përmbyllur procesin e konstituuimit të Kuvendit të Kosovës, përcjell Gazeta KFVA. 

Kështu është bërë e ditur nga Kuvendi i Kosovës, ku në rend të ditës është zgjedhja e nënkryetarit të Kuvendit nga radha e komunitetit serb.

Kjo seancë do të mbahet dy ditë pasi Gjykata Kushtetuese e nxori aktgjykimin, në të cilin konstatoi se kuvendi nuk është konstituuar.

Kushtetuesja ka urdhëruar të gjithë deputetët e zgjedhur të Kuvendit që gjatë procedurës së zgjedhjes së nënkryetarit të Kuvendit të Republikës së Kosovës nga radhët e deputetëve të komunitetit serb, të ushtrojnë funksionin e tyre kushtetues në interesin më të mirë  dhe në pajtim me Kushtetutën dhe Rregulloren e Kuvendit.