Asamblisti i Kuvendit Komunal të Mitrovicës, Fisnik Suma, ka demantuar Ministrin e Bujqësisë Faton Peci, i cili e kishte akuzuar Komunën e Mitrovicës për mos ndërtimin e  fushës ndihmëse të KF Trepçës, shkruan Gazeta KFVA.

Me dokumente të publikuara asamblisti i tregojë Pecit se sa i përket obligimeve komuna ka kryer të gjitha, por është ministri Hajrulla Çeku ai i cili e ka mbajtur peng projektin pasi nuk e ka nënshkruar.

Suma shprehet se sporti i Mitrovicës nuk duhet të bëhet viktimë e lojërave politike të ministrave  veç për vota.

“Është e papranueshme që Ministri Peci të hedhë fajin mbi Komunën e Mitrovicës për mosndërtimin e fushës ndihmëse të KF Trepçës, kur faktet flasin të kundërtën.Komuna e Mitrovicës e ka kryer obligimin e vet me kohë, parcela është ndarë, dokumentet janë gati dhe procedurat janë përfunduar sipas ligjit.Por ajo që mungon është nënshkrimi i Ministrit Hajrullah Çeku, i cili prej vitesh e ka mbajtur peng këtë projekt, duke dëmtuar sportin mitrovicas dhe të rinjtë që presin kushte dinjitoze për zhvillim.Mitrovica nuk ka nevojë për justifikime, por për vepra!Sporti i Mitrovicës nuk duhet të bëhet viktimë e lojërave politike të ministrave që kujtohen për qytetin vetëm kur vjen koha e kamerave dhe e votave.Komuna e ka bërë punën e vet, ministria jo!”, tha Suma.