260 gjyqtarë nga e gjithë Shqipëria u mblodhën sot në Tiranë, ku në një deklaratë të përbashkët kërkuan shpalljen “Dëshmor i Atdheut” për gjyqtarin e Apelit, Astrit Kalaja, i vrarë tri ditë më parë në sallën e gjyqit.

Në deklaratën e lexuar publikisht, gjyqtarët e cilësuan këtë akt si një goditje të rëndë ndaj shtetit të së drejtës dhe kërkuan masa urgjente për garantimin e sigurisë fizike të gjyqtarëve dhe kushteve të punës në gjykata. Ata propozuan krijimin e një Forumi Kombëtar për Sigurinë Gjyqësore, një platformë të re sigurie, ndërhyrje në ligje dhe ndërtimin e godinave të reja për gjykatat në të gjithë vendin.

Gjyqtarët theksuan se nuk do të heshtin më përballë kërcënimeve dhe se kërkojnë jo privilegje, por respekt dhe mbrojtje për të përmbushur detyrën kushtetuese. Ata i kërkuan KLGJ-së, Kuvendit dhe Qeverisë të ndërmarrin veprime konkrete për forcimin e sistemit të drejtësisë.

Në nderim të Astrit Kalajës, gjyqtarët kërkuan që salla e mbledhjeve pranë KLGJ të mbajë emrin e tij dhe që figura e tij të njihet zyrtarisht si “Dëshmor i Atdheut”.