Kur nuk është e mbushur me sheqer dhe yndyra të ngopura, çokollata e zezë konsiderohet një “ëmbëlsirë për zemrën”, pasi është e pasur me përbërës që ulin rrezikun e sëmundjeve koronare

Sipas zbulimeve të kardiologëve nga dy spitale kineze – Spitali Popullor Shaoxing dhe Spitali Popullor Zhuji – çokollata e zezë ul rrezikun e hipertensionit esencial. Hipertensioni është një term mjekësor që përshkruan presionin e lartë kronik të gjakut, ndërsa hipertensioni esencial përdoret kur shkaku mbetet i panjohur.

---

Flavanolët, përbërësit që e bëjnë çokollatën e zezë të shëndetshme

Në një punim të botuar në revistën Scientific Reports, një grup kardiologësh shpjegon se si përdorën randomizimin e Mendelit – metodë epidemiologjike që studion variacionet gjenetike për të zbuluar lidhjen mes konsumimit të çokollatës së zezë dhe hipertensionit. Kjo teknikë, e quajtur sipas Gregor Mendelit, shërben për të treguar nëse një ndërhyrje është shkaku i një efekti të caktuar dhe ndihmon në uljen e rrezikut nga keqinterpretimi i lidhjeve shkak-pasojë.

Në vitet e fundit është vërtetuar se çokollata e zezë ka përfitime shëndetësore, kryesisht falë flavanolëve që përmban. Ndër to përfshihet ulja e inflamacionit dhe reduktimi i faktorëve të lidhur me sëmundjet koronare. Kjo e çoi ekipin kërkimor të pyesë nëse konsumimi i saj mund të ulë edhe rrezikun e hipertensionit esencial, i cili lidhet me një sërë sëmundjesh, nga goditja në tru deri te sulmi në zemër, transmeton Telegarfi.

Çokollata e zezë, “ëmbëlsirë për zemrën”

Çokollata e zezë është e pasur me antioksidantë që luftojnë sëmundjet. Studimet tregojnë se mund të ndihmojë në uljen e presionit të gjakut dhe në reduktimin e rrezikut të sëmundjeve kardiovaskulare. Kur nuk përmban shumë sheqer dhe yndyra të ngopura, ajo konsiderohet “ëmbëlsirë për zemrën”.

Ekspertët theksojnë se moderimi është çelësi, pasi çokollata e zezë, si çdo çokollatë tjetër, ka kalori të larta dhe nëse konsumohet tepër mund të shkaktojë shtim në peshë. Megjithatë, në sasi të vogla mund të përfshihet në një dietë të ekuilibruar.

Studime të tjera kanë treguar se kombinimi i bajameve të papërpunuara, çokollatës së zezë dhe kakaos ndihmon në uljen e rrezikut nga sëmundjet koronare. Një punim i botuar në Journal of the American Heart Association zbuloi se kjo përzierje uli nivelin e LDL-së, lipoproteinës me dendësi të ulët, e njohur si “kolesteroli i keq” për shkak të rolit të saj në bllokimin e arterieve.

GettyImages

Çokollata e zezë është e pasur me antioksidantë

Kjo çokollatë përmban antioksidantë të ngjashëm me ata që gjenden në fruta, perime, arra dhe fara, përfshirë kokrrën e kakaos, përbërësin kryesor të saj. Antioksidantët ndihmojnë në luftimin e inflamacionit dhe mbrojnë qelizat nga dëmtimet që shkaktojnë radikalet e lira, nënprodukte të proceseve biologjike në trup, si frymëmarrja apo tretja, por edhe nga faktorë të jashtëm si tymi i duhanit, toksinat ose ndotja.

Radikalet e lira mund të dëmtojnë qelizat, proteinat dhe ADN-në, duke kontribuar në shfaqjen e sëmundjeve. Trupi përdor antioksidantët për të ulur ose parandaluar efektet e tyre. Çokollata e zezë është veçanërisht e pasur me flavanolë, një lloj flavonoidi me përfitime të shumta shëndetësore, përfshirë veprimin e tyre si antioksidantë.

Potencial për trajtimin e hipertensionit esencial

Duke u bazuar në të dhënat e Njësisë për Epidemiologji Integrative të MRC, që përfshinin profilet gjenetike të 64.945 njerëzve me origjinë evropiane, studiuesit kërkuan lidhjen midis konsumimit të çokollatës së zezë dhe sëmundjeve si insuficienca kardiake, mpiksja e gjakut, goditja në tru dhe infarkti.

Nga analiza e të dhënave, ata zbuluan një lidhje të fortë mes konsumimit të rregullt të çokollatës së zezë dhe uljes së rrezikut të hipertensionit esencial, si dhe një lidhje të caktuar me uljen e rrezikut të tromboembolizmit venoz. Studiuesit theksojnë se këto rezultate janë të mjaftueshme për të justifikuar kërkime të mëtejshme mbi çokollatën e zezë dhe përbërësit e saj, për të zbuluar nëse ajo, ose një nga komponentët e saj, mund të shërbejë si ndihmë në trajtimin e hipertensionit esencial.