Një person ka mbetur i vdekur si pasojë e një aksidenti në rrugën Suharekë–Shtime, në mes të fshatrave Duhle dhe Carralevë, mes një autobusi dhe një automjeti, shkruan Gazeta KFVA.
Rastin për Gazetën e ka konfirmuar zëdhënësi i rajonit, Shaqir Byqtyqi, i cili tregon se në aksident kanë mbetur të lënduar edhe dy persona të tjerë të cilët janë dërguar për trajtim mjekësor në spitalin e Prizrenit.
“Sot, më datë 28.09.2025, rreth orës 19:00, në rrugën Suharekë–Shtime, në mes të fshatrave Duhle dhe Carralevë, ka ndodhur një aksident trafiku mes një autobusi dhe një automjeti .
Si pasojë e aksidentit, një pasagjer i automjetit ka humbur jetën në vendngjarje, ndërsa dy të lënduarit janë dërguar për trajtim mjekësor në spitalin e Prizrenit. Nga të dhënat e para dyshohet se automjeti BMW ka humbur kontrollin dhe është përplasur me autobusin”, tha Bytyqi.
Hetimet për zbardhjen e plotë të rastit janë në zhvillim.