Në një kohë kur Kosova është zhytur në krizë të thellë politike si pasojë e zvarritjes së qëllimshme të Albin Kurtit dhe Vetëvendosjes, Shtetet e Bashkuara të Amerikës duken më të angazhuara se kurrë në vendin tonë, shkruan Gazeta KFVA.

Sulmet e parreshtura të Kurtit ndaj Gjykatës Kushtetuese dhe deklaratat nxitëse, sidomos ndaj Listës Serbe dhe gjyqtarëve, nuk kaluan pa u vërejtur e pa pasoja. SHBA-ja pezulloi javën e shkuar dialogun strategjik pikërisht për këto veprime të Kurtit.

Për më tepër, Departamenti i Shtetit njoftoi edhe zyrtarisht për mediat në Kosovë se Ambasada e SHBA-së kishte marrë urdhër që t’ia kumtonte Kurtit pakënaqësinë e madhe të Washington-it me veprimet e qeverisë në detyrë.

Se Kurti e mbushi kupën, këtë e konfirmoi edhe ish-ambasadori amerikan Jeff Hovenier. Për pretendimet se Kurti ende ka marrëdhënie të mira me SHBA-në, Hovenier tha se këto thjesht janë të pavërteta.

Edhe pas pezullimit të dialogut strategjik me Kosovën, SHBA-ja nuk e ndali angazhimin e saj për përmirësimin e marrëdhënieve dhe ruajtjen e rendit demokratik.

Të mërkurën, një lëvizje mjaft domethënëse ndodhi në raport me Kushtetuesen. Kryetari i këtij institucioni, Nexhmi Rexhepi, zhvilloi një bisedë telefonike me Drejtorin për Europën Perëndimore dhe Qendrore në Departamentin e Shtetit, Mark Fleming.

“Biseda u fokusua në punën e deritanishme të Gjykatës Kushtetuese të Republikës së Kosovës dhe rolin e saj në ruajtjen dhe forcimin e sundimit të ligjit në vend. Kryetari Rexhepi e falënderoi z. Fleming për telefonatën dhe shprehu vlerësimin e tij për mbështetjen e vazhdueshme të Qeverisë së SHBA-së për punën dhe pavarësinë institucionale të Gjykatës Kushtetuese të Republikës së Kosovë”, u tha në njoftimin për këtë telefonatë.

Bisedë me zyrtar të lartë të Departamentit të Shtetit pati edhe Vjosa Osmani, e cila jo më larg se javën e kaluar thoshte se me Kurtin janë në një linjë. Brendan Hanrahan pati telefonatë me të mbrëmë, ndërsa ajo u zotua që do ta mbrojë aleancën me SHBA-në. Me sulme të ulëta ndaj Kushtetueses as Osmani hiç keq s’ia la.

Pra, SHBA-ja është e angazhuar si kurrë më parë në mbrojtjen e pavarësisë së gjyqësorit dhe rendit demokratik në Kosovë. Departamenti i Shtetit vendosi ta ndërpresë bashkëpunimin me qeverinë aktuale të Kurtit, por tha se me popullin e Kosovës vazhdon të ketë marrëdhënie të mira.