Deçan, KFVA – Fushata për kryetar të komunës së Deçanit ka hyrë edhe në terrenin virtual, por jo gjithmonë me qytetarë realë. Monitorimi i gazetës KFVA ka zbuluar qindra profile të dyshimta në Facebook, të cilat shfaqen si “kinezë” dhe janë aktivizuar gjatë fushatës për të sulmuar kundërshtarët dhe për të krijuar përshtypjen e mbështetjes ndaj kandidates së PSD-së, Natyre Kuçi.

Çfarë zbuloi monitorimi

Sipas hulumtimit, këto profile janë hapur kryesisht muajt e fundit, kanë pak ose aspak informacion personal dhe përdorin fotografi të rastësishme. KFVA ka dokumentuar aktivitetin e tyre të përsëritur në postimet e Bashkim Ramosajt dhe drejtorit të arsimit të komunës, ku komentet shpesh përmbajnë sulme dhe mesazhe të njëjta.

“Janë profile që sillen si të koordinuara, hapur gjatë fushatës, me një qëllim të qartë: të krijojnë një realitet artificial në rrjete sociale,” thotë ekipi i monitorimit.

Iluzioni i mbështetjes

Ky fenomen ngre dyshime serioze mbi mënyrën si po përdoren rrjetet sociale në fushatë. Në pamje të parë, duket sikur kandidatja Kuçi ka një valë të madhe përkrahësish, por në fakt bëhet fjalë për klikime false dhe për profile që nuk përfaqësojnë qytetarë të Deçanit.

Ekspertë të komunikimit politik theksojnë se profile të tilla shërbejnë vetëm për të rritur numrat digjitalë dhe për të ushqyer perceptimin e fuqisë, por nuk kanë asnjë peshë në kutinë e votimit.