Në listën e Bekë Berishës për Asamblenë e Komunës së Prishtinës, po del në pah një emër që premton të sjellë frymë të re në politikën lokale: Pelloponeza Jakupi. E lindur më 8 maj 2002 në Prishtinë, ajo është në vitin e fundit të studimeve në Fakultetin Juridik, me fokus në të drejtën publike dhe qeverisjen lokale.

Jakupi përfaqëson një gjeneratë të re të grave që nuk pranojnë të rrinë spektatore. Ajo e ka ndërtuar profilin e saj mbi dijen juridike, përkushtimin ndaj shërbimit publik dhe vizionin për një qeverisje transparente e të drejtë. Me një bagazh akademik të fokusuar në të drejtën publike dhe mbrojtjen e të drejtave të qytetarëve, ajo shfaqet si zë i fuqishëm për barazi dhe drejtësi.

“Qytetarët e Prishtinës meritojnë transparencë, llogaridhënie dhe vendimmarrje të pastër. Unë besoj fuqishëm se e ardhmja ndërtohet mbi ligj dhe mbi guximin e të rinjve për të ndryshuar realitetin”, ka deklaruar ajo.

Pelloponeza Jakupi synon të përfaqësojë energjinë, idealet dhe vizionin e të rinjve të kryeqytetit, duke dëshmuar se fuqia e një gruaje të re të arsimuar është motor i vërtetë i ndryshimit. Kandidatura e saj shihet si një prej prurjeve më të forta të listës së Bekë Berishës, duke i dhënë politikës komunale një dimension të ri, ku gratë nuk janë thjesht pjesëmarrëse, por lidere të së ardhmes.