Presidenti rus Vladimir Putin ka bërë thirrje për përshpejtimin e zhvillimit të motorëve të rinj për avionë dhe raketave, gjatë një vizite në qytetin jugor të Samaras.

Gjatë takimit me drejtues të industrisë ajrore dhe hapësinore, ai theksoi rëndësinë strategjike të rinovimit të kapaciteteve prodhuese, si për nevojat e brendshme ashtu edhe për konkurrencë në tregjet ndërkombëtare.

“Numri i motorëve të avionëve të prodhuar është rritur me 50 për qind në katër vitet e fundit. Rusia ka qenë dhe mbetet një nga liderët botërorë në eksplorimin e hapësirës”, tha Putin.

Putin vuri në dukje edhe përparimin e bërë në prodhimin e motorëve për sektorin energjetik, pavarësisht sanksioneve ndërkombëtare, duke përmendur si projekt kyç gazsjellësin “Fuqia e Siberisë 2”, i cili pritet të forcojë eksportet drejt Kinës.

“Është jetike të përfundojmë zhvillimin dhe të nisim prodhimin në seri të motorit të ri PD-26. Ky motor do të modernizojë avionët ushtarakë dhe do të hapë rrugën për ndërtimin e avionëve të rinj civilë me trup të gjerë”, shtoi presidenti rus.

Kjo vizitë vjen pas udhëtimeve të Putinit në Kinë dhe Vladivostok, ku janë zhvilluar diskutime mbi bashkëpunimin ekonomik dhe zhvillimet teknologjike. Rusia synon të forcojë pozitat e saj në industrinë hapësinore dhe energjetike, ndërsa përballet me sfida të shumta gjeopolitike dhe ekonomike