kfvanews
Edhe për të paktën 25 ditë është shtyrë nisja e procedurave për formimin e Qeverisë, me vendim të Gjykatës Kushtetuese. Por, si pasojë e kësaj zvarritje, janë paralajmëruar pasoja të rënda ekonomike, politike e ndërkombëtare.
Naim Jakaj, hulumtues i Institutit të Kosovës për Drejtësi, thotë se nëse bllokada vazhdon dhe Qeveria nuk formohet deri më 31 tetor për ta proceduar buxhetin e vitit 2026 në Kuvend, do të ketë pasoja financiare të theksuara.
“Pasojat fillimisht do të jenë financiare, buxhetore të brendshme, në ndërkohë ato të jashtme ato që mund të bëhemi pjesë e përjashtimit të marrjes së fondeve nga plani i rritjes për shkak që ne nuk po mbërrijmë që ta konstituojmë një Kuvend, rrjedhimisht t’i miratojmë ato marrëveshje ndërkombëtare sepse edhe për miratimin e atyre marrëveshjeve ndërkombëtare duhet me pas qeveri, nuk mundet Kuvendi vetë të hyjë një obligimi sepse nuk mundet më pastaj t’i ekzekutojë ato detyrime të cilat i merr përsipër t’i kryejë”, ka thënë Jakaj.
E sipas analistit Shkodran Ramadani, përveç pasojave ekonomike e atyre ndërkombëtare, mungesa e kompromisit për formimin e institucioneve të reja për kohë kaq të gjatë do të shkaktojë dëm edhe në aspektin politik në Kosovë.
Më 30 shtator do të përfundojë masa e përkohshme e Gjykatës, e cila është nxjerrë sipas detyrës zyrtare, por edhe duke u bazuar në kërkesën e deponuar në Kushtetuese, një javë më parë nga Lista Serbe.
Në kërkesën e saj, Lista Serbe kërkon që Gjykata ta urdhërojë kryeparlamentarin Dimal Basha që të përsërisë votimin e zgjedhjes së nënkryetarëve nga komunitetet dhe këtë ta bëjë në pako.
Në anën tjetër anipse nuk kanë treguar rezultat në punën e tyre, buxheti është shpenzuar për pagat e deputetëve.
Nga 15 prilli e deri më 30 shtator, kur edhe përfundon masa e fundit e përkohshme e Kushtetueses, deputetët do të paguhen në total mbi 1.26 milionë euro nga buxheti i shtetit. E krahas pagës bazë, kanë edhe kompensime shtesë, përfshirë ato për angazhimin e asistentëve
Bazuar në kalkulimin e pagave të tyre, deputetët për punën e bërë në zhvillimin e vazhdimeve të seancës konstituive kanë marrë rreth 460 mijë euro, sa edhe për ditët e pauzave. Vazhdimet e seancës konstituive, që nga 15 prilli janë mbajtur kryesisht çdo 48 orë.
E për ditë të pushimeve gjatë dy masave të përkohshme të caktuara nga Kushtetuesja, më 30 shtator do të rrumbullakohet në 340 mijë euro vlera e pagesave për ta
