Presidenti i SHBA-së, Donald Trump, ka thënë se mund të dërgojë Gardën Kombëtare në Portland, me sa duket i mashtruar nga një raport televiziv që gabimisht përdori pamje të protestave të mëdha në vitin 2020 për të portretizuar protestat aktuale, shumë më të vogla.

Trump pretendoi se pa prova të “shkatërrimit të qytetit”, megjithëse situata aktuale në Portland është dukshëm e ndryshme, shkruan The Guardian.

“Do ta them këtë, po e shikoja sot, nuk e dija që po ndodhte, por Portland është i pabesueshëm, çfarë po ndodh”, tha Trump.

I pyetur nëse do të dërgonte trupa, ai tha: “Epo, do ta shoh tani sepse nuk e dija që po ndodhte ende. Kjo ka ndodhur prej vitesh. Mund ta ndalojmë shumë lehtë, por Portland nuk ishte në listën time, por kur po shikoja televizor mbrëmë, kjo po ndodh.”

Në fakt, protestat që po zhvillohen këtë vit jashtë ndërtesës së Imigracionit dhe Doganave (ICE) në Portland po mbledhin vetëm një grusht njerëzish, maksimumi disa dhjetëra.

Kjo është e pakrahasueshme me protestat pas vrasjes së George Floyd nga policia në vitin 2020, kur mijëra, madje dhjetëra mijëra, demonstrues u mblodhën në qendër të qytetit për muaj të tërë.

Kryebashkiaku i Portlandit, Keith Wilson, tha se ndërhyrja federale nuk ishte e nevojshme.

“Ashtu si kryetarët e tjerë të bashkisë në të gjithë vendin, unë nuk kam kërkuar – dhe nuk kam nevojë – për ndërhyrje federale”, tha ai në një deklaratë.

“Jemi krenarë që policia e Portlandit ka mbrojtur me sukses lirinë e fjalës, ndërsa adreson dhunën e rastit dhe shkatërrimin e pronës që ndodhi gjatë protestave në objektin e ICE. Portlandi do të vazhdojë të përballet me sfida si një qytet strehimi krenar.”

Edhe pse presidenti nuk specifikoi se cilin raportim shikoi, Fox News transmetoi një raport të enjten që përziente pamjet nga një protestë e kohëve të fundit me dhjetëra pjesëmarrës me një video virale nga viti 2020.

Në klipin kontrovers, një agjent federal qëlloi me gaz lotsjellës protestuesin Christopher David, dhe raporti deklaroi gabimisht se videoja është bërë në qershor të këtij viti.

Presidenti përsëriti gjithashtu pretendime të pabaza në lidhje me protestuesit.

“Këta janë terroristë të paguar”, tha ai.

Prokurori i Përgjithshëm i Oregonit, Dan Rayfield, ka kërcënuar me veprime ligjore nëse Trump dërgon trupa.

“Ne jemi përgatitur për një përgjigje që kur Trump u kthye në detyrë”, tha Rayfield. /KFVA/