Në qendër të Bujanocit janë shfaqur grafite me emrin e kriminelit të luftës Ratko Mladiq. Politikani nga Lugina e Preshevës, Ragmi Mustafi, i ka publikuar fotot, ndërsa grafitet i ka quajtur të papranueshme dhe kërcënim ndaj sigurisë e bashkëjetesës, shkruan KFVA.

Mustafi, që është këshilltar i zëvendëskryeministrit në detyrë të Kosovës, Besnik Bislimi, thotë se serbizimi sistematik i Bujanocit po ndodh me mjete më të sofistikuara.

Ai tutje ka kujtuar se si ishte thyer billboardi i Komandant Lleshit, në përvjetorin e rënies së tij, dhe nuk kishte asnjë reagim nga autoritetet, as ato policore e as institucionale të Serbisë.

Postimi i tij i plotë:

𝐆𝐑𝐀𝐅𝐈𝐓𝐄𝐓 𝐌𝐄 𝐄𝐌𝐑𝐈𝐍 𝐄 𝐊𝐑𝐈𝐌𝐈𝐍𝐄𝐋𝐈𝐓 𝐓𝐄̈ 𝐋𝐔𝐅𝐓𝐄̈𝐒 𝐑𝐀𝐓𝐊𝐎 𝐌𝐋𝐀𝐃𝐈𝐐 𝐍𝐄̈ 𝐙𝐄𝐌𝐄̈𝐑 𝐓𝐄̈ 𝐁𝐔𝐉𝐀𝐍𝐎𝐂𝐈𝐓 𝐉𝐀𝐍𝐄̈ 𝐍𝐉𝐄̈ 𝐏𝐑𝐎𝐕𝐎𝐊𝐈𝐌 𝐈 𝐑𝐄̈𝐍𝐃𝐄̈, 𝐈 𝐏𝐀𝐏𝐑𝐀𝐍𝐔𝐄𝐒𝐇𝐄̈𝐌 𝐃𝐇𝐄 𝐊𝐄̈𝐑𝐂𝐄̈𝐍𝐈𝐌 𝐍𝐃𝐀𝐉 𝐒𝐈𝐆𝐔𝐑𝐈𝐒𝐄̈ 𝐄 𝐁𝐀𝐒𝐇𝐊𝐄̈𝐉𝐄𝐓𝐄𝐒𝐄̈𝐒

!
Në një qytet me shumicë shqiptare, në vitin 2025, të shfaqet publikisht emri i gjeneralit të dënuar për gjenocid në Srebrenicë, bashkë me simbole nacionaliste e urrejtëse, është dëshmi e qartë e rrënimit të sigurisë publike dhe mosndëshkimit institucional.

Në gusht, u thye billboard-i i Komandant Lleshit, në përvjetorin e rënies së tij. Asnjë reagim nga autoritetet. As policore. As institucionale.

Paraprakisht ishin shfaqë grafite me thirrje për vrasje të shqiptarëve dy herë tek Shtëpia e Shëndetit. Prapë heshtje.

Sot, kemi këtë: “РАТКО МЛАДИЋ” me të kuqe në qendër të qytetit me katër C. E njohim mirë këtë stil. Nacionalizëm, provokim dhe frikësim i qëllimshëm i shqiptarëve në vendin e tyre.

Sepse “multietniciteti” aty po ndërton realitetin e ri. Serbizimi sistematik i Bujanocit.

Kjo nuk ndodh me dhunë të hapur, por me mjete më të sofistikuara. Me letra që shpifin kundër shqiptarëve, me emërime që përjashtojnë shqiptarët, me përjashtim të simboleve dhe figurave kombëtare shqiptare, me ndëshkim të atyre që guxojnë të flasin.

(P.S. A ju të APN-ës atë goblenin tem, keni me lyp. Veq vonë keni me kuptu fatkeqësisht. )