Komuna e Prishtinës, e udhëhequr nga Përparim Rama, së fundmi ka nënshkruar një kontratë për ndërtimin e kontejnerëve, kiosqeve dhe tualeteve publike. Edhe pse tenderi ishte i hapur, vetëm një operator ekonomik ka aplikuar, i cili fitoi kontratën. E në mesin e punëve të parapara, ndërtimi i një kioske bazë me dizajn të veçantë ka ngritur reagime, pasi çmimi i saj dyshohet të jetë afro 57 mijë euro. Insajderi sjell detaje.

Komuna e Prishtinës me 20 gusht ka nënshkruar tenderin për “Ndërtimi i kontejnerëve mbitokësor dhe nëntokësor, furnizimi dhe zgjerimi”- “Ndërtimi, furnizimi i kiosqeve dhe tualeteve publike”.

Vlera e parashikuar e këtij tenderi ka qenë 5,000,000.00 euro.

Tenderi është dhënë me procedurë të hapur, por që përkundër kësaj, kishte aplikuar vetëm një operator ekonomik.

Operatori fitues i tenderit me çmim 153,916,26 euro, është “MONTING SH.P.K”.

Në përshkrimin e punëve, sipas dosjes së tenderit, ndërtimi i kontejnerëve mbitokësor dhe nëntokësor, furnizimi dhe zgjerimi- Ndërtimi, furnizimi i kiosqeve dhe tualeteve publike, është një kontratë kornizë që parashihet të zgjatë 36 muaj.

Në përshkrimin e punëve, janë të cekura 132 pika.

Në këtë tender është e përfshime ndërtimi i një kioske bazë. Ajo thuhet se do të ketë modularitet japonez.

“Dizajni i Kioskave është inspiru nga kioska K63 dhe nga modulariteti japonez i bashkimit të elementve të ndryshme, me një prekje të lehtë në formën e saj Kioska vie më këndore dhe me një theksim të veqant në fasada, duke e rikthy stilin retro të Prishtinës së viteve 60’ta. Ajo prezanton arkitekturën bashkohore e cila lidhet me kontekstin urbanistik, gjeografik dhe kulturor të qytetit të Prishtinës”.

E që çmimi i lartë kësaj kioske, ka ngritur reagime. Ani pse në faqen e tenderit nuk po figuron çmime për punët që do të kryhen, përpos vlerës së përgjithshme.

Çmimi i kësaj kioske dyshohet se është afro 57 mijë euro.

Kështu ka shkruar Petrit Reçica, i cili ka publikuar një dokument ku edhe figuron çmimi i veçantë i kioskes, prej 56, 500 mijë euro.

Gazeta ka hulumtuar, por që tani në faqen e tenderit, çmimi i kioskes nuk figuron fare, sikurse në dokumentin më poshtë.

Në përshkrimin e tenderit, thuhet se Kiosku bazë : Furnizimi, transproti dhe montimi i KIOSKUT BAZË me kararkteristika minimale duke u bazuar ne pjesen e dizajnit: Furnizimi dhe punimi i Kioskave me material nga poliesteri i përforcuar me fibra qelqi. Mbushja brenda guacës kompozitë të izolohet me shkumë izoluese poliuretani. Muret, dyshemeja, plafoni të gjitha punohen nga i njejti material. Dimensionet e Kioskës | 240x290x285cm.

Furnizimi me material dhe ngjyrosja e kioskave me Pigmented Gelcoat.  Ngjyra duhet të jetë e qëndrushme, rezistente ndaj rrezeve UV dhe kushteve atmosferike. Ngjyra | Kaltërt | RAL 5011 ose Gjelbërt | RAL 7009-130 50 10-Green Grey.

Furnizimi me material dhe punimi i dyshemesë së ngritur me gomë mat nga prodhuesi ARMSTRONG flooring | UNIPLUS R711-825 (ose prodhues i ngjashëm). Furnizimi me material dhe punimi i dyshemesë së ngritur me profile metalik. Hapsira nën këtë konstruksion do përdoret për vendosjen e instalimeve.

Furnizimi dhe montimi i dyerve dhe dritareve për Kioskën të punuara nga profilet dhe llamarinat e metalit të galvanizuar  sipas skemave dhe specifikimeve në projekt duke përfshirë edhe montimin me të gjitha mjetet e nevojshme për lidhje dhe fiksim. Xhami të jetë xham i kalitur me trashësi 6mm . Ky xham do përdoret për të gjithë Kioskën ku mund të vendoset LED monitori.

Kioska që do të ndërtohet ka pamjen kështu:

Tutje, do të ndërtohen edhe tualete publike, të cilat do të projektohen për të ndërlidhur dy Kioska me një sipërfaqe prej afro13m².

“Tualeti është projektuar për të ndërlidhur dy Kioska me një sipërfaqe prej afro13m².Kjo ndërlidhje bëhet me modulin lidhës i cili lejon rritjen e hapsirës së Kioskës për shfrytëzim të dy tualeteve të ndara për të dy gjinitë. Qasja për në tualete bëhet përmes një rampe e punuar nga alumini e përshtatshme për qasje të personave me aftësi të kufizuara.

Tualeti vendoset mbi një themel pllakë nga betoni i armuar i futur në 50cm thellësi nën nivelin e terrenit për mbrojtje të themelit nga ndikimet e ngricave, kështu tualeti akomodohet mbi këtë pllakë e cila e bënë të jetë stabile dhe e sigurtë.

Tualeti është parapa të punohet nga poliesteri i përforcuar me fibra qelqi, i cili përveq që ofron siguri dhe qëndrueshmëri, ofron edhe jetëgjatësi.Ky material krijon mure të dyfishta brendësia e të cilave mbushet me shkumë iozluese poliuretani. Pjesa e hapjeve tek nuk punohet nga qelqi por me panele nga poliesteri I përforcuar me fibra qelqi, përshkak të privatësisë materiali nuk duhet të jetë transparent.

Dyshemeja është parapa të bëhet nga materiali i gomës i cili po ashtu është ngritë në një platformë konstruktive me qëllim të shfrytëzimit të hapsirës për instalime. Goma është material i qëndrushëm dhe jo
rrëshqitës, i rekomanduar për hapsirat komerciale por edhe për tualetet publike”, thuhet në dosjen e tenderit.

Tualetet publike:

Kompania MONTING SHPK, është e vetmja që ka ofertuar në tenderin e hapur të komunës së Prishtinës, e cila edhe ka fituar kontratën.

Sipas ARBK’së pronar i kompanisë MONTING SHPK, është Enver Ahmeti.

Gazeta ka dërguar pyetje në komunën e Prishtinës, për ta konfirmuar se a është çmimi i vërtetë prej afro 57 mijë eurove për një Kioskë, por deri në publikimin e këtij teksti nuk kanë kthyer përgjigje.