Deputeti i Partisë Demokratike të Kosovës (PDK), Abelard Tahiri ka reaguar ashpër ndaj qeverisë në detyrë pas ngjarjes tragjike në Gjilan, ku u vranë tre persona.
Tahiri përmes një postimi në Facebook, ka përkrahur protestën e qytetarëve të Gjilanit, duke akuzuar kryeministrin në detyrë, Albin Kurti dhe ministrin në detyrë të Punëve të Brendshme, Xhelal Sveçla për heshtje dhe mosveprim.
“Me plot të drejtë, sot qytetarët e Gjilanit kanë thirrur protestë në qytet.Pesë ditë heshtje nga Sfeqla e Kurti për mos arrestimin e fajdexhiut që vrau tre qytetarë të pafajshëm!
Jo vetëm heshtje – por edhe mbrojtje të hapur”, ka shkruar ai.
Ai u ka bërë thirrje qytetarëve që protestat t’i drejtojnë ndaj Lëvizjes Vetëvendosje.
“Në ditën e tragjedisë, në vend që qyteti të ‘blindohej’ në çdo hyrje e dalje derisa autori të kapej, atij iu hap rruga për t’u arratisur. Adresa para së cilës duhet të protestohet është Lëvizja Vetëvendosje – aty buron krimi dhe tmerri që po e terrorizon Gjilanin”, ka shkruar Tahiri.
Reagimi i plotë:
Një protestë pritet të mbahet sot para Gjykatës Themelore në Gjilan, pas ngjarjes tragjike të vrasjes së trefishtë që tronditi qytetin dhe mbarë opinionin publik në Kosovë.
Protesta është thirrur për orën 19:00, me qëllim që të shprehet revolta qytetare ndaj sistemit të drejtësisë, i cili po akuzohet për neglizhencë dhe dështim në parandalimin e krimit.