Pas rastit tragjik në të cilin u vranë tre persona në Gjilan, më 10.08.2025, në vendin e ngjarjes ishte arrestuar një person i dyshuar.

Në konferencën për media, të mbajtur të dielën në mbrëmje, drejtori i Drejtorisë Rajonale të Policisë në Gjilan, Agron Rukiqi, kishte njoftuar se një person ishte arrestuar në vendin e ngjarjes, ndërsa tre të dyshuarit kryesorë për vrasjen e trefishtë, Mefail Shkodra dhe dy djemtë e tij, Edonis dhe Engjull Shkodra, ishin në arrati.

Lidhur me të arrestuarin drejtori Rukiqi kishte thënë se janë duke u zhvilluar hetimet për të mësuar nëse ai ka qenë i përfshirë në këtë rast.

I arrestuari në vendin e ngjarjes ishte Enis Shkodra, djali tjetër i Mefail Shkodrës.

Për rastin e Enis Shkodrës ka folur në emisionin “Debat Plus” në RTV Dukagjini avokatja e tij, Lirije Kovani, e cila njoftoi se klienti i saj është liruar në procedurë të rregullt.

“Prokurori i shtetit sot e la të lirë dhe është ndërprerë masa e ndalimit. Ai është liruar në procedurë të rregullt pasi me asnjë provë të vetme nuk është vërtetuar që ai ka qenë i përfshirë në këtë rast” – tha avokatja.

Sipas avokates klienti i saj në momentin kur ka ndodhur incidenti tragjik nuk ka qenë fare në vendin e ngjarjes dhe ka alibi për këtë.Ajo shpjegoi se klienti i saj kishte shkuar në vendin e ngjarjes vetëm pasi nëna e tij e kishte thirrur në telefon dhe e kishte njoftuar se diçka kishte ndodhur.

Ajo shpjegoi se klienti i saj kishte shkuar në vendin e ngjarjes vetëm pasi nëna e tij e kishte thirrur në telefon dhe e kishte njoftuar se diçka kishte ndodhur.

Gjithnjë sipas avokates, klienti i saj ka shkuar në vendin e ngjarjes, ka pyetur njerëzit se çfarë ka ndodhur, u afrohet zyrtarëve policorë dhe u tregon se kush ishte – djali i Mefail Shkodrës, e pas kësaj zyrtarët policorë e fusin në veturën e Policisë, fillimisht për shkaqe sigurie, dhe më pas e dërgojnë në stacionin policor në Gjilan, e intervistojnë si të dyshuar për pjesëmarrje në rrahje, dhe më pas, me vendim të prokurorit të shtetit e ndalojnë për 48 orë.

Avokatja tregoi se dje, më 11.08.2025, është mbajtur seanca në Prokurorinë e Gjilanit, ku klienti i saj ka treguar se në kohën kur ka ndodhur ngjarja ka qenë duke bërë incizimin video në një aheng familjar dhe se nuk ka qenë fare prezent në vendin e ngjarjes dhe nuk ka pasur njohuri se çka ka ndodhur.

Një ngjarje tragjike ka ndodhur rreth mesditës të së dielës, më 10.08.2025, në qendër të Gjilanit.Tre persona janë vrarë me armë zjarri dhe të dyshuar për vrasje të rëndë janë Mefail Shkodra dhe dy djemtë e tij – Edonis dhe Engjull Shkodra.Të tre ende janë në arrati.