kfvanews
Nëse dikush mendon se loja Maqedoni–Rumani ishte një ndeshje basketbolli, atëherë ndoshta beson edhe se cirku është akademi shkencore. Sepse ajo që ndodhi në Kumanovë nuk ishte sport, ishte një orgji politike e mbuluar me rrjeta basketbolli dhe fyerje që do ta bënin edhe një diktator të skuqej nga turpi. U shanë nënat shqiptare. U kërkua vdekja e shqiptarëve dhe Maqedoni e pastër pa ta.
Kryeministri Mickoski, i cili u shfaq në tribunë si një superstar i urrejtjes, u duartrokit nga tifozët sikur sapo kishte shpikur mënyrën për të zhdukur shqiptarët me një buzëqeshje. Dhe ndërsa nënat shqiptare u shanë me një kreativitet që do ta kishin zili edhe autorët e satirës më të errët, ai nuk tha as “hm”. As një fjalë. As një ngritje vetulle. Heshti si një statujë që i kanë hequr edhe dinjitetin, ama me shumë krenari.
Por prit, se ironia nuk ka fund — ajo është një spirale që të tërheq poshtë, si një gropë septike ku VLEN ka vendosur të bëjë fushatë. Disa ditë më parë, Mickoski ftoi anëtarët e VMRO-së që të dalin e fuqishëm të mbështesin kandidatët e VLEN — po, pikërisht ata kandidatë që shpresën e fundit e kanë në votat e atyre që shajnë nënat shqiptare si sport kombëtar. VLEN, që dikur pretendonte të ishte zëri i shqiptarëve, tani duket si zëri i atyre që duan shqiptarët të heshtin, të zhduken, ose të shërbejnë si kamerierë në festat e VMRO-së.
Kjo nuk është politikë. Kjo është një farsë e ndyrë, një teatër ku aktorët shqiptarë luajnë rolin e të nënshtruarit, ndërsa publiku maqedonas kërkon bis.
Prandaj, zgjedhjet lokale nuk janë më zgjedhje. Janë referendum. Jo për të zgjedhur përfaqësues, por për të zgjedhur mes dinjitetit dhe servilizmit. Mes të qenit njeri dhe të qenit vegël. Mes atyre që mbrojnë të drejtat dhe atyre që i shesin për një vend në tribunën e urrejtjes, sepse kur nënat shqiptare shihen si mbeturina, çdo votë për VLEN është një gozhdë në arkivolin e dinjitetit tonë.
P.S. VLEN eshte koalicioni qe e mbeshtet Kryeministri Albin Kurti
Analizë për Kosova Free Voice Agency- KFVA, nën autorësinë e ekspertit të politikës dhe marrëdhënieve ndërkombëtare nga Maqedonia e Veriut, G.A.
