kfvanews
Faton Klinaku, ish-kryetar i OVL-UÇK, ka reaguar pasi në media është publikuar aktakuza për kanosje ndaj kryeministrit në detyrë, Albin Kurtit.
Klinaku është fokusuar tek deklarata e Kurtit para organeve të rendit, ku ka thënë se beson që prokuroria do t’i trajtojë rastet e kërcënimit.
“Çfarë dyfytyrëshi është more ky, herë i beson e herë nuk i beson prokurorisë”, ka deklaruar Klinaku.
Më 10 qershor 2025, Kryeministri në detyrë, Albin Kurti ka dëshmuar para Policisë në cilësinë e të dëmtuarit/dëshmitarit lidhur me rastin ku Faton Klinaku dhe Nuredin Selmani akuzohen për kanosje ndaj tij. Aty thuhet se Kurti ka deklaruar se nuk ndihet i kërcënuar apo rrezikuar.
Sipas aktakuzës së siguruar nga “Betimi për Drejtësi“, Kurti para zyrtarëve policorë ka deklaruar se fushata e shpifjeve dhe dezinformimi është i madh, por që beson në përkushtimin, profesionalizmin dhe përgjegjshmërinë e organeve të rendit dhe sigurisë.
Kurti kishte shtuar se beson që Prokuroria do t’i trajtojë rastet sipas legjislacionit në fuqi dhe në dobi të interesit publik.
“Besoj që Prokuroria e shtetit, do t’i trajtoj këto raste sipas legjislacionit në fuqi dhe në dobi të interesit publik“, citohet të ketë thënë Kurti.
