I dërguari i posaçëm amerikan Steve Witkoff viziton Gazën të premten për të inspektuar pikat e shpërndarjes së ushqimit, konfirmon Shtëpia e Bardhë

Sekretarja për shtyp e Shtëpisë së Bardhë, Karoline Leavitt, konfirmoi se i dërguari i posaçëm amerikan, Steve Witkoff, do të vizitojë Gazën të premten, së bashku me ambasadorin amerikan në Izrael, Mike Huckabee. Vizita ka për qëllim sigurimin e një plani për shpërndarjen e mëtejshme të ushqimeve dhe takimin me banorët lokalë për të dëgjuar drejtpërdrejt për situatën e rëndë në terren.

Leavitt shtoi se Witkoff, i cili ndodhet për vizitë në Izrael, ka pasur një takim “produktiv” me kryeministrin izraelit Benjamin Netanyahu, ku diskutuan dilema lidhur me ndihmën humanitare në Gaza.

Situata në Gaza: mbi 100 të vdekur brenda 24 orëve

Ndërkohë, Ministria e Shëndetësisë në Gaza, e drejtuar nga Hamas, raportoi se 111 persona janë vrarë në 24 orët para mesditës së së enjtes, nga të cilët 91 ishin duke kërkuar ndihma ushqimore.

Të mërkurën, një drejtor spitali i tha BBC-së se mbi 50 palestinezë u vranë dhe 400 të tjerë u plagosën pranë pikës së kalimit Zikim në veri të Gazës, ndërsa prisnin për ndihma ushqimore. Pamje të incidentit tregonin viktima të transportuara me karroca drejt spitalit al-Shifa në qytetin e Gazës.

Agjencia e Mbrojtjes Civile e kontrolluar nga Hamas deklaroi se forcat izraelite hapën zjarr ndaj turmave të mbledhura pranë kamionëve me ndihma. Ushtria izraelite (IDF) tha se ushtarët qëlluan “të shtëna paralajmëruese” dhe se nuk ishte në dijeni për ndonjë viktimë nga zjarri i tyre.

Kërcënime për masa të reja dhe komente nga Trump

Zyrtarët izraelitë paralajmëruan se nëse nuk ka përparim në marrëveshjen për armëpushim dhe lirimin e pengjeve, mund të merren masa ndëshkuese të reja kundër Hamasit – përfshirë aneksimin e pjesëve të Gazës, sipas mediave izraelite.

Pas mbërritjes së Witkoff në Izrael, Presidenti amerikan Donald Trump shkroi në rrjetet sociale: “Mënyra më e shpejtë për t’i dhënë fund krizës humanitare në Gaza është që Hamas të DORËZOHET DHE TË LIRËOJË PENGJET!!!”

Situatë humanitare alarmante dhe akuza për urinë masive

Ekspertë të sigurisë ushqimore të mbështetur nga OKB paralajmëruan të martën se “skenari më i keq i urisë” po ndodh aktualisht në mesin e popullsisë prej 2.1 milionë banorësh në Gaza.

Agjencitë e OKB-së deklaruan se po ndodh një urie masive e shkaktuar nga njeriu dhe fajësuan Izraelin, i cili kontrollon hyrjen e të gjitha furnizimeve në Gaza. Izraeli ka këmbëngulur se nuk ka kufizime për dërgesat e ndihmave dhe se “nuk ka uri”.

Megjithatë, katër ditë më parë, ushtria izraelite njoftoi masa për të ndihmuar OKB-në dhe partnerët e saj në shpërndarjen e ndihmave, përfshirë “pauza taktike” të përditshme në tre zona dhe krijimin e “korridoreve humanitare të caktuara”.

Zyra humanitare e OKB-së deklaroi se këto pauza nuk lejojnë një rrjedhë të vazhdueshme të furnizimeve për të përmbushur nevojat masive të popullsisë, dhe se turmat e uritura vazhdojnë të shkarkojnë ndihmat direkt nga kamionët që kalojnë nga pikat kufitare izraelite.

Dëshmitarët tregojnë për viktima dhe dëshpërim të thellë

Drejtori i spitalit al-Shifa, Mohammed Abu Salmiya, tha se të enjten në mëngjes ishin pranuar trupat e 54 personave të vrarë në zonën e Zikimit një ditë më parë, si dhe 412 të plagosur.

Mbrojtja Civile e Hamasit raportoi të paktën 30 të vrarë nga zjarri izraelit, ndërsa Gjysmëhëna e Kuqe palestineze tha se spitalet e saj në qytetin e Gazës pranuan 6 të vdekur dhe 274 të plagosur nga e njëjta ngjarje.

IDF deklaroi se “dhjetëra banorë të Gazës ishin mbledhur rreth kamionëve me ndihma në veri të Gazës, pranë trupave izraelite” dhe se ushtarët qëlluan “të shtëna paralajmëruese” për shkak të një “kërcënimi të perceptuar”, pa qëlluar drejt turmës.

Si zakonisht, gazetarët ndërkombëtarë nuk lejohen të hyjnë në mënyrë të pavarur në Gaza, çka e bën të vështirë verifikimin e pavarur të ngjarjeve.

Një banor lokal, intervistuar nga një gazetar i pavarur për BBC-në, tha se një djalë i ri që njihte ishte qëlluar për vdekje:
“Nuk ka ushqim apo ujë. Shkuan të merrnin miell dhe u qëlluan. E sollën të mbështjellë në thesin e miellit. Çfarë ishte faji i tij? E goditën në kokë. Nuk kishte armë, as gurë. Faji i tij i vetëm ishte se ishte palestinez dhe jetonte në Gaza.”

Një tjetër viktimë, Abu Taha al-Kafarneh, ishte një baba i papunë dhe i vetmi që siguronte të ardhura për familjen. Ai ishte në kërkim të një thesi me miell “vetëm për të ushqyer familjen, jo për ta shitur ose përfitim,” tha një banor tjetër për BBC-në.

Ai shtoi: “Ata [Izraeli] thonë se lejojnë ushqim, por vetëm rrisin numrin e viktimave. Morgu është plot.”

Vrasje edhe në Rafah

Në jug të Gazës, burime spitalore i thanë BBC-së të mërkurën në mëngjes se gjashtë persona u vranë pranë një qendre shpërndarjeje ndihmash të drejtuar nga Fondacioni Humanitar i Gazës (GHF), i mbështetur nga SHBA dhe Izraeli, në zonën e Rafahut.

IDF tha se një “grumbullim personash të dyshuar” që përbënin kërcënim për trupat e saj u urdhëruan të largoheshin dhe se më pas u qëlluan “të shtëna paralajmëruese” qindra metra larg vendit.

Ushtria izraelite shtoi se një “rishikim fillestar” sugjeron se numri i viktimave të raportuara nuk përputhet me të dhënat që ajo disponon.

GHF deklaroi se nuk pati asnjë vrasje në apo pranë pikave të saj të ndihmës ditën e mërkurë.