Kompania amerikane Continental Strategy, e kontraktuar nga Partia Demokratike, i ka kërkuar nëpërmjet një shkrese zyrtare Departamentit Amerikan të Shtetit që të heqë sanksionimin non grata ndaj kryedemokratit Sali Berisha, pasi vendimi sipas saj nuk bazohet në fakte dhe ka qenë i motivuar politikisht.

“Shpallja sipas nenit 7031(c) e ish-Presidentit dhe ish-Kryeministrit të Shqipërisë, Sali Berisha, duhet të hiqet menjëherë. Kjo shpallje ishte e motivuar politikisht, pa bazë faktike, dëmtoi interesat e politikës së jashtme të SHBA-së dhe kontribuoi në përkeqësimin e situatës në Shqipëri, që sot kritikët e përshkruajnë si një ‘shtet-narkotik’.”

Në kërkesë, kompania lobuese argumenton se heqja e sanksionimit do t’i shërbente edhe rikthimit të besueshmërisë së Shteteve të Bashkuara në Ballkan.

“Ndërsa demokracia në Shqipëri është nën kërcënim serioz dhe Berisha nuk është më një figurë aktive politike, heqja e shpalljes do të rikthente neutralitetin dhe besueshmërinë amerikane në rajon.”

Si argument mbështetës për kërkesën e saj, kompania i kujton DASH edhe zgjerimin e përdorimit të sanksioneve gjatë administratës Biden, e cila ka vendosur mbi 300 sanksionime në katër vite. Sipas saj, nga këto sanksionime nuk janë kursyer edhe zyrtarë të qeverive që bashkëpunojnë me SHBA-në, ndërsa kritikohet për shmangien e regjimeve të majta që gjithashtu përballen me akuza për korrupsion.

Sali Berisha u shpall person non grata në SHBA më 19 maj të vitit 2021, vendim që solli zhvillime të rëndësishme në politikën shqiptare dhe në veçanti në Partinë Demokratike, ku pas tentativës së Lulzim Bashës për ta përjashtuar nga kjo forcë politike, Berisha u rikthye në krye të saj. Berisha e kundërshtoi shpalljen non grata si të motivuar politikisht, duke paditur në Francë sekretarin e Shtetit të asaj kohe, Antony Blinken, dhe duke akuzuar kryeministrin Edi Rama si furnizuesin kryesor të DASH me informacione të pavërteta kundër tij.