Një tërmet me magnitudë 8.8 ballë ka goditur Gadishullin Kamchatka në Lindjen e Largët të Rusisë, duke shkaktuar një cunam deri në katër metra lartësi, dëme në ndërtesa dhe paralajmërime masive për evakuim përgjatë bregdetit të Oqeanit Paqësor.

Sipas autoriteteve ruse, disa persona janë lënduar në rajonin e goditur. Banorëve të pjesës lindore të Japonisë – zonë që përjetoi cunamin shkatërrues të vitit 2011 – iu është kërkuar të evakuohen menjëherë.

“Tërmeti i sotëm ishte serioz dhe më i forti në dhjetë vitet e fundit”, deklaroi guvernatori i Kamchatkës në Telegram. Ministri Rajonal i Situatave të Emergjencave, Sergei Lebedev, konfirmoi se pas tërmetit u regjistrua një cunami prej 3 deri në 4 metrash, duke bërë thirrje që “të gjithë të largohen nga bregu”.

Instituti Amerikan i Sizmologjisë raportoi se tërmeti ndodhi në një thellësi prej 19.3 km, rreth 125 km nga Petropavlovsk, një qytet me rreth 165 mijë banorë.

Në Japoni, mbi 1.9 milion njerëz janë urdhëruar të evakuohen, ndërsa Agjencia Meteorologjike ka paralajmëruar për valë cunami deri në 3 metra. Paralajmërimet shtrihen nga Hokkaido në veri deri në prefekturën Wakayama në jug, duke mbuluar qindra kilometra përgjatë bregdetit të Paqësorit.

Në SHBA, autoritetet në Hawaii dhe Kaliforni kanë lëshuar paralajmërime për banorët që të qëndrojnë larg plazheve dhe zonave të ulëta. Ekspertët amerikanë theksojnë se nuk pritet ndonjë dëm i madh në territorin e SHBA-ve, ndërsa guvernatori i Hawaii-t u ka kërkuar qytetarëve të ruajnë qetësinë.